Cuti Romero kurorëzon Alvarezin si më të mirin në botë dhe pasardhësin ideal të Messit

Mbrojtësi i njohur Cristian “Cuti” Romero ka thurur elozhe për bashkëkombësin dhe shokun e tij të skuadrës te Atletico Madridi, Julián Álvarez, duke e vlerësuar atë si lojtarin më të mirë në rruzull për momentin. Gjatë një paraqitjeje në kanalin zyrtar në YouTube të “LosEdul”, qendërmbrojtësi argjentinas u ndal te tematikat rreth Kombëtares së Argjentinës, ndërsa u përgjigj pa asnjë lloj hezitimi kur u pyet për futbollistin që udhëheq botën e futbollit aktualisht. “Julián Álvarez”, ishte përgjigjja e prerë e Romeros. Një tjetër pyetje interesante për mbrojtësin ishte se kujt duhet t'i besohet fanella e njohur me numrin 10 e Lionel Messit, e cila në të kaluarën i ka takuar edhe legjendës Diego Maradona. Në instancë të parë, Romero propozoi një ide mjaft origjinale, duke sugjeruar që ky numër historik të mos i jepet askujt. “Do ta vendosja në një mural në AFA, në mënyrë që askush tjetër të mos e kishte atë përgjegjësi”, theksoi ai. Megjithatë, duke qenë i vetëdijshëm se një gjë e tillë është e pamundur, ai theksoi se zgjedhja e tij e parë do të ishte sulmuesi i Atletico Madridit. “Meqë kjo nuk mund të bëhet, do t’ia jepja Julit. Pastaj, secili e ka mendimin e vet. E shoh me atë profil të përulësisë, si njeri familjar dhe djalë të mirë. Ai i ka edhe cilësitë e duhura. Besoj se kemi shumë lojtarë të rëndësishëm në Kombëtare, por them Juliánin sepse tek ai i shoh të gjitha këto cilësi që janë të rëndësishme për ta bartur fanellën me numrin 10”, përfundoi Romero. Romero synon të lërë gjurmë te Atletico Madridi Duke folur për sfidat dhe synimet e tij nën fanellën e Atletico Madridit, mbrojtësi theksoi dëshirën e zjarrtë për të fituar një trofe me fanellën e klubit madrilen. “Ëndrra ime është të fitoj diçka me Atleticon, sepse ndiej se e vetmja mënyrë për ta lënë emrin tim të shkruar në historinë e këtij klubi është të fitoj një trofe. Këtu kanë kaluar shumë lojtarë dhe besoj se e vetmja mënyrë që të të kujtojnë është të bësh gjëra shumë të mira dhe të fitosh ndonjë garë me klubin. Prandaj, do të përpiqem deri në ditën e fundit që do të jem këtu”, u shpreh ai. Romero gjithashtu potencoi se që nga hapat e parë në Madrid është ndier si në shtëpinë e tij, ndërsa shtoi se edhe familja e tij po kalon momente shumë të lumtura. “Që nga dita e parë kur mbërrita, e ndjeva se kisha gjetur një shtëpi të re. Kisha kohë që dëshiroja të vija këtu. Familja ime është shumë e lumtur dhe do të jap maksimumin deri në ditën e fundit”, deklaroi argjentinasi. Ai shtoi se ky mentalitet fitues është çelësi që dëshiron t'ua përcjellë edhe pjesëtarëve të tjerë të skuadrës. “E kemi të qartë se objektivi është të fitojmë diçka me klubin. Këtë mesazh do ta përcjellim edhe brenda dhomës së zhveshjes. Kemi një grup shumë të mirë, me këmbë në tokë dhe askush nuk e mbivlerëson veten. Për ne, çdo ndeshje është si një finale, sepse duam ta fitojmë një trofe me këtë klub”, theksoi Romero. Megjithëse ka vetëm rreth dy muaj që është integruar në skuadër, ai shprehu përkushtimin për t'i ndihmuar shokët e skuadrës në luftën për lavdi deri në fund. “Do të ishte diçka historike për të gjithë grupin nëse në fund të sezonit do ta ngrinim një trofe. Ky është objektivi im kryesor, sepse e vetmja mënyrë që të të kujtojnë është të fitosh diçka. Do të punoj çdo ditë për ta arritur këtë”, shtoi ai. Romero flet edhe për Simeonen dhe lojtarin që do ta transferonte Në fund, qendërmbrojtësi nuk la pa përmendur as trajnerin Diego Simeone dhe karakterin e tij tejet energjik përgjatë ndeshjeve zyrtare. “Në ndeshje bëhet paksa i çmendur pranë zonës së stolit. Por ti je aq i përqendruar saqë nuk e vëren. Ndërsa në përditshmëri është shumë i qetë”, përfundoi Romero.