Mbyllet hetimi për grantet në bujqësi, Fitore Pacolli: Drejtësia vuri në vend të vërtetën

Prokuroria Speciale ka mbyllur zyrtarisht hetimet ndaj ministres së Mjedisit, Fitore Pacolli, lidhur me çështjen e subvencioneve dhe granteve në dikasterin e bujqësisë. Lajmi është bërë i ditur vetë nga ajo përmes një njoftimi publik. Pacolli ka theksuar se ky vendim zyrtar vërteton pafajësinë e saj dhe hedh poshtë çdo pretendim për përfshirje, ndikim apo ndërhyrje në procesin e shpërndarjes së fondeve publike nga kjo ministri. Sipas saj, gjatë gjithë kësaj periudhe është bërë objekt i fushatave të padrejta, të cilat i ka cilësuar si sulme dhe shpifje të orkestruara nga qarqe të caktuara politike dhe mediatike.