Aksident i rëndë në Gjakovë: Pesë persona përfundojnë në spital, dy në gjendje kritike

Një aksident i rëndë rrugor, i regjistruar në fshatin Zhur të Gjakovës, ka rezultuar me lëndimin e pesë personave, të cilët kanë kërkuar menjëherë ndihmë mjekësore. Sipas informacioneve zyrtare nga Spitali i Përgjithshëm “Isa Grezda” në Gjakovë, të lënduarit kanë mbërritur në repartin e urgjencës rreth orës 17:30 për të marrë trajtimin e nevojshëm. Për shkak të gjendjes së rëndë shëndetësore, dy nga viktimat e këtij aksidenti – një grua dhe një fëmijë – janë dërguar me urgjencë në Qendrën Klinike Universitare të Kosovës (QKUK) për kujdes të specializuar mjekësor. Ndërkohë, tre personat e tjerë të lënduar po vazhdojnë mjekimin brenda mureve të Spitalit të Gjakovës. Dy prej tyre janë shtrirë në Repartin e Ortopedisë, kurse një tjetër po trajtohet nga ekipet mjekësore në Repartin e Kirurgjisë. Burimet spitalore bëjnë me dije se, pavarësisht lëndimeve, gjendja shëndetësore e tre pacientëve që po mbahen sub-vëzhgim në Gjakovë paraqitet stabile dhe jashtë rrezikut për jetën.