Iniciativa për Gjykatën Speciale, Hoxhaj zbulon qëndrimin e prerë të PDK-së dhe pritshmëritë e reja

Deputeti i Partisë Demokratike të Kosovës, Enver Hoxhaj, ka bërë të qartë se subjekti i tij politik nuk është tërhequr aspak nga nisma për Ligjin për Gjykatën Speciale, duke ritheksuar angazhimin e palëkundur për ta mbajtur atë në fuqi. Duke komentuar kërkesën e partisë për rikthimin e këtij ligji në Kuvend, Hoxhaj e ka definuar atë si një qëndrim me peshë politike, morale dhe negociuese, i cili shërben për të mbrojtur figurat kryesore të Ushtrisë Çlirimtare të Kosovës që po përballen me procesin gjyqësor në Hagë. Sipas ligjvënësit të PDK-së, pritet që shqyrtimi i këtij drafti të nisë që javën e ardhshme në Komisionin për Legjislacion. Ai ka shkuar më tej, duke e quajtur heqjen dorë nga ky ligj në të kaluarën si një gabim të rëndë dhe plotësisht të panevojshëm. "Nuk kemi hequr dorë prej ligjit, as nuk e kem anuluar. Meqë ne e shohim ligjin si një pozicionim politik për të dalë në mbrojtje të krerëve të UÇK-së në Hagë, e shohim edhe si një pozicionim moral, meqë për atë ligj kanë dalë në protesta për mbi 20 ditë shumë qytetarë të Kosovës, mendojmë që edhe moralisht si PDK duhet edhe më tutje të luftojmë që ky ligj të jetë në fuqi", ka shtuar ai gjatë një interviste televizive. Duke vënë theksin te rëndësia e këtij hapi, Hoxhaj theksoi se kërkesa e tyre përfaqëson njëherësh një pozicion negociues, teksa shprehu bindjen se çështja do të kalojë shpejt në shqyrtim parlamentar. "Jam i bindur që javën e ardhshme ligji për Specialen do të jetë në Komisionin për Legjislacion, duhet të ketë një urgjencë për miratimin e tij sa më të shpejtë dhe mendoj që kërkesa jonë që ky ligj të tërhiqet ka qenë një gabim fatal, e panevojshme dhe e padomosdoshme", u shpreh Hoxhaj.