Epoka pas Messi-t: Kapiteni i ri i Argjentinës zbulon se kujt i takon fanella me numrin 10

Pas largimit të Lionel Messi-t nga radhët e Kombëtares, Cuti Romero është caktuar të mbajë shiritin e kapitenit te Argjentina, duke nisur kështu një kapitull të ri për skuadrën. Në opinionin sportiv vijon të diskutohet se cili do të trashëgojë fanellën ikonike me numrin 10, e cila mbart një peshë të jashtëzakonshme për tifozët argjentinas, pasi në të kaluarën është mbajtur nga dy legjenda të mëdha të futbollit botëror, Diego Armando Maradona dhe vetë Leo Messi. Gjatë një prononcimi për mediet vendase, mbrojtësi Cuti Romero ka ndarë emocionet e tij për marrjen e kësaj përgjegjësie të lartë, duke treguar gjithashtu se cili lojtar e meriton sipas tij këtë numër historik. “Për mua është një nder i madh të jem kapiten i kombëtares. Të vijnë ndërmend fillimet, e kaluara dhe momentet e vështira. Të arrish këtu dhe të jesh pjesë e epokës së artë të kombëtares është diçka e jashtëzakonshme. Aq më tepër kur mendon se nga vij unë”, u shpreh Romero në fjalën e tij. Duke u ndalur te çështja e fanellës me numrin 10, ai nuk ka pasur asnjë dyshim në zgjedhjen e tij, duke ia besuar atë sulmuesit kryesor të skuadrës. “Unë do t’ia jepja numrin ’10’ Julian Alvarezit. Ai është sulmuesi më i mirë në botë”, përfundoi kapiteni i ri i Argjentinës.