Harry Kane: Rekordi i Shearer nuk është në plan të parë, synoj trofe të mëdhenj me Bayernin dhe Anglinë

Pasi u kurorëzua me “Topin e Artë” mbrëmjen e së hënës në Londër, sulmuesi Harry Kane ka sqaruar se thyerja e rekordit të Alan Shearer nuk përbën prioritet për të në këtë fazë të karrierës. Përballë shifrave ku Shearer kryeson si golashënuesi më i mirë në histori të Premier League me 260 gola, ndërsa Kane renditet i dyti me 213 sosh, bomberi anglez preferon të fokusohet gjetkë. Në planet e tij afatgjata, Kane synon të vazhdojë të performojë në elitën e futbollit edhe kur të ketë kaluar moshën 30-vjeçare, duke vënë theksin te trofetë madhorë si me klubin, ashtu edhe në skenën ndërkombëtare. “Jo për momentin nuk e mendoj rikthimin në Angli. Më pëlqen shumë jeta në Mynih. Bayern është një klub vërtet i madh. Kemi një skuadër të jashtëzakonshme dhe një trajner të shkëlqyer. Pra, po, për momentin aty është përqendrimi im. Jam jashtëzakonisht i lumtur dhe fakti që fitoj çmime të tilla, tregon qartë pse e mora vendimin për t’u transferuar atje”, u shpreh Kane. Kapiteni i Kombëtares së Anglisë bëri të qartë se triumfi në një kompeticion të madh ndërkombëtar mbetet aspirata e tij parësore, krahas sukseseve të vazhdueshme në futbollin evropian. “Gjithmonë ka ambicie, gjithmonë ka ëndrra për arritje të reja dhe gjëra të reja. Kam ende shumë për të arritur në këtë sport, në nivel klubesh, si dhe fitimin e një trofeu të madh me Anglinë; ky është padyshim prioriteti im numër një”, përfundoi ai.