Ndikimi i Luka Modriç te Milani: Vlera e tij nuk diskutohet, sakrifica bëhet pa top

“Kur vjen këtu, e ndien. Historia e Milanit është kudo. Kjo ishte një nga arsyet pse zgjodha të vija”, pati deklaruar Luka Modriç në shtatorin e kaluar. Mesfushori kroat pranoi se synimi i tij ishte të paraqitej edhe më mirë se një vit më parë. Ndonëse vitet kalojnë, klasa dhe eleganca e tij në fushë mbeten të paprekura. Ardhja e Ruben Amorimit në krye të pankinës kuqezi solli disa risi në vendosjen e 41-vjeçarit. Ndërsa Massimiliano Allegri e konsideronte që në ditën e parë si trurin e skuadrës, i ndihmuar nga dy mesfushorë me fizikalitet të lartë, kroati u shndërrua në dirigjentin kryesor. Ai e mbylli edicionin e kaluar si futbollisti i dytë në Serie A për numrin e pasimeve të sakta, gjithsej 2.473, me një saktësi prej 90.4 për qind. Në njëfarë kuptimi, kjo qasje më e matur dhe më e kujdesshme në fazën e prapavijës i shkonte për shtat Modriçit, i cili tashmë ka hyrë në moshën 41-vjeçare. Me emërimin e Amorimit, pritej që skuadra nga Milano të adoptonte një ritëm më shpërthyes, sidomos pas kalimit te skema 3-4-3. Një orientim i tillë rrezikonte ta vinte në vështirësi Modriçin, duke qenë se ai regjistron distancën më të shkurtër mesatare në Serie A për sa i përket vrapimeve me intensitet të lartë, me vetëm 349.3 metra. Pavarësisht kësaj, gjiganti italian po e përshtat gradualisht fizionominë e vet në fushë. Një tregues i qartë është fakti se Milani është ngjitur nga vendi i 17-të në të 9-tin sa i përket skuadrave që u lejojnë më pak pasime kundërshtarëve. Zëvendësimi i Modriçit në fraksionin e parë të sfidës ndaj Lazios, kur kuqezinjtë po humbisnin 2-0 pikërisht para ndërprerjes për shkak të ndeshjeve kombëtare, ngriti pikëpyetje nëse prania e tij po pengonte adoptime të skemave të reja. Megjithatë, faktet flasin ndryshe: Milani nuk zotëron në organikë një tjetër interpretues me të njëjtën cilësi pasimi dhe vizion për të drejtuar lojën. Modriç renditet i dyti në Serie A për mesataren e pasimeve të gjata, me 10.4 për ndeshje, ndërsa mban vendin e parë për numrin e kundërshtarëve që lë pas pikërisht përmes këtyre topave, me një mesatare prej 13.4. Për më tepër, kontributi i tij po jep frute të dukshme edhe në aspektin e rezultateve. “Modriç nuk mund të bëjë presion përgjatë gjithë takimit, por ai e ka ritmin e lojës në pëllëmbë të dorës dhe kupton çdo situatë më mirë se kushdo tjetër”, ka theksuar trajneri Amorim. “Si teknik, më duhet të marr vendime. Ndoshta humbasim diçka te presingu, por me Modriçin në fushë fitojmë në kontroll. Nëse na duhet të sakrifikojmë diçka, preferoj që kjo të ndodhë kur nuk e kemi topin në zotërim”, ka shtuar strategu portugez. Veterani kroat e nisi nga minuta e parë të tria ndeshjet e kampionatit pas rikthimit nga detyrat me kombëtaren. Ai dhuroi një asist për Adrien Rabiot në barazimin ndaj Sassuolos, ndërsa bëri të njëjtën gjë edhe për Christian Pulisic, duke i dhënë hov suksesit ndaj Udineses. Sipas statistikave të specializuara nga “Opta”, Modriç ka lënë pas Zlatan Ibrahimoviqin si lojtari mbi moshën 40-vjeçare me më shumë asistime në elitën italiane që prej sezonit 2004/05. Ai mban tashmë kuotën e katër asistimeve. Pulisic e ka vlerësuar maksimalisht pasimin e saktë të kroatit, i cili nisi nga mesfusha pas një ekzekutimi të standardeve. “Kur Modriç e kontrollon topin, detyra ime është vetëm të sulmoj hapësirën e lirë prapa vijës mbrojtëse. E pashë se kishte hapësirë, u futa shpejt, e zotërova topin dhe realizova”, ka përmbledhur sulmuesi amerikan. Në atë përballje, Modriç luajti për herë të parë deri në vërshëllimën përfundimtare.