Neymar rrezikon një pezullim të rëndë prej gjashtë ndeshjesh pas incidentit në kampionatin brazilian

Sulmuesi i njohur brazilian, Neymar, po përballet me rrezikun e një dënimi deri në gjashtë ndeshje larg fushave të blerta, pasi u ndëshkua me karton të kuq gjatë duelit mes Santosit dhe Bahias, takim ky që u mbyll me barazimin 1-1. Incidenti ndodhi gjatë një përplasjeje verbale mes tij dhe lojtarit Rodrigo Nestor, ku Neymar u pa duke e mbuluar gojën me dorë ndërsa fliste. Ky gjest ka aktivizuar atë që njihet tashmë në opinionin sportiv si “rregulli Vinicius Junior”. Në debat e sipër, Nestor e etiketoi sjelljen e rivalit si mungesë respekti. Nga ana e tij, ylli i Santosit ka hedhur poshtë akuzat se ka fyer kundërshtarin, megjithëse ka pranuar se mbulimi i gojës gjatë komunikimit përbën një gabim nga ana e tij. Madhësia e kësaj çështjeje ka bërë që ajo të kalojë për shqyrtim pranë instancave disiplinore në Brazil, të cilat do të vendosin mbi fatin e mëtejshëm të lojtarit. Seanca zyrtare dëgjimore është caktuar të mbahet këtë të mërkurë. Në rast se organet kompetente vendosin masën maksimale të pezullimit, Neymar rrezikon të mbyllë parakohe këtë edicion futbollistik, duke u detyruar të ndjekë nga tribuna gjashtë sfidat e mbetura të kampionatit.