E ardhmja e Vinicius Junior në dyshim: Real Madridi cakton shifrën e majme për brazilianin

Perspektiva e Vinicius Juniorit te skuadra e Real Madridit ka hyrë në një fazë pasigurie, pasi strukturat drejtuese të klubit kryeqytetas po shqyrtojnë seriozisht mundësinë e transferimit të tij gjatë merkatove të ardhshme. Sipas burimeve nga shtypi iberik, disa prej zyrtarëve më të lartë të “Los Blancos” i kanë sugjeruar numrit një të klubit, Florentino Perez, që të shqyrtojë çdo ofertë potenciale për sulmuesin 26-vjeçar, ku shifra fillestare për të ulur palët në tavolinë parashikohet të jetë rreth 150 milionë euro. Pozita e Viniciusit ka pësuar ndryshime përgjatë javëve të fundit, kryesisht si pasojë e rënies së formës së tij sportive dhe shpërthimit të talentit Yan Diomande, i cili ka shfrytëzuar dëmtimin e brazilianit për të siguruar minuta vendimtare nën urdhrat e trajnerit Jose Mourinhos. Statistikat e këtij edicioni në La Liga tregojnë për vetëm një gol dhe tri asistime në tetë ndeshje për Viniciusin, shifra që bien ndesh me pritshmëritë e larta për potencialin e tij. Kjo situatë u rëndua edhe më shumë pas ndëshkimit me karton të kuq në duel me Villarrealin, dënim ky që solli pezullimin e tij prej katër takimesh. Në mungesë të sulmuesit kryesor, 19-vjeçari Diomande ka lënë mbresa të jashtëzakonshme, veçanërisht në ndeshjen kundër Sevillas, ku realizoi një gol, shërbeu një asistim dhe nxori një penallti. Futbollisti nga Bregu i Fildishtë ka rënë në sy edhe për aftësitë e tij në driblim, duke realizuar 31 nga 45 tentativa, përballë shifrave 16 nga 36 të regjistruara nga Vinicius para duelit të "El Clasico". Këto tregues kanë gjeneruar debate të brendshme te gjiganti spanjoll lidhur me fatin e brazilianit, ku një pjesë e drejtuesve mendojnë se shitja e tij mund të sjellë të ardhura të konsiderueshme financiare, sidomos nëse Diomande ruan të njëjtin ritëm rritjeje. Megjithatë, klubi nga “Santiago Bernabeu” nuk ndodhet nën trysni për ta lënë të lirë lojtarin, pasi pak kohë më parë Vinicius rinovoi kontratën e tij deri më 30 qershor 2032. Kjo marrëveshje afatgjatë i siguron institucionit një pozicion komod në tryezën e bisedimeve, duke i dhënë luksin për të hedhur poshtë çdo propozim që nuk i përgjigjet standardeve ekonomike të klubit. Aktualisht, vlera prej 150 milionë eurosh përflitet thjesht si një bazë nisjeje për bisedime dhe ende nuk ka mbërritur ndonjë propozim zyrtar nga skuadrat e interesuara. Kthimi i Viniciusit në fushat e La Ligas është parashikuar për datën 21 nëntor kundër Celta Vigos, ndërsa paraqitjet e tij në vazhdim do të jenë përcaktuese për fatin e tij afatgjatë në Madrid. Në rast se braziliani nuk arrin të rimarrë formën e dikurshme dhe Diomande vazhdon me këto hapa lartësues, Real Madridi mund t'i shqyrtojë me vëmendje ofertat për kartonin e tij gjatë vitit 2027.