Tragjedia në Vitomiricë: Organizata QIKA kërkon shkarkimin e ministres Donika Gërvalla pas vrasjes së Arlinda Zekajt

Pas vrasjes tragjike të Arlinda Zekajt në Vitomiricë të Pejës, organizata QIKA ka ndërmarrë një aksion simbolik në oborrin e Ministrisë së Drejtësisë, duke kërkuar publikisht dorëheqjen e ministres Donika Gërvalla dhe duke e ngarkuar atë me përgjegjësi të drejtpërdrejtë politike për dështimin e organeve shtetërore në këtë rast. Në kuadër të këtij reagimi, aktivistët kanë shpalosur mesazhe dhe citate të vetë viktimës në ambientet e ministrisë. Qëllimi i këtij veprimi ka qenë që t'i rikujtohet ministres, e cila mban edhe detyrën e koordinatores nacionale për mbrojtjen nga dhuna në familje, dhuna ndaj grave dhe dhuna në baza gjinore, obligimi kushtetues dhe institucional për të garantuar sigurinë e qytetarëve. Sipas të dhënave të bëra publike nga organizata, e ndjera Arlinda Zekaj i ishte drejtuar institucioneve kompetente për të kërkuar mbrojtje, mirëpo mekanizmat shtetërorë kanë dështuar totalisht në parandalimin e epilogut fatal.