Karoglan para sfidës me Elbasanin: Duhet të pranojmë realitetin, pres një kundërshtar agresiv

Starti i aventurës së Mislav Karoglan në krye të Partizanit nuk ka qenë aspak i lehtë, me trajnerin kroat që ka regjistruar dy humbje radhazi në dy takimet e para, shoqëruar me gjashtë gola të pësuar. Ngërçi në prapavijë mbetet një sfidë e hapur për “Demat e Kuq”, pavarësisht ndryshimit në drejtim. Për 17 herë kampionët e vendit, sfida e radhës do të luhet nesër në transfertë ndaj Elbasanit, e vlefshme për javën e 9-të të Abissnet Superiores. I pyetur nëse ndien presion pas humbjes së fundit ndaj Skënderbeut, Karoglan u shpreh se tensioni është i pashmangshëm në një klub me ambicie të larta. Ai theksoi se ka biseduar me grupin e lojtarëve, duke nënvizuar se aktualisht është e nevojshme të pranohet realiteti i situatës. Sipas tij, prioritet mbetet konsolidimi i mbrojtjes, pasi golat e pësuar kanë kushtuar edhe pozicionin në tabelën e klasifikimit. Megjithatë, kalendari i ngjeshur me ndeshje çdo tre deri në katër ditë nuk lejon një zhvillimoptimal të seancave stërvitore, çka e detyron skuadrën të përshtatej dhe të kërkojë maksimumin. Duke analizuar shkaqet e kësaj ecurie, kreu i stafit teknik refuzoi të gjejë alibi, por tërhoqi vëmendjen te mungesat e shumta, ku shtatë lojtarë, afërsisht gjysma e formacionit, janë jashtë fushës për shkak dëmtimesh. Ai veçoi 25 minutat e para kundër Skënderbeut si një tregues të lojës cilësore, por nuk fshehu zhgënjimin për rënien e ritmit në vazhdim. Karoglan vuri theksin te gjendja psikologjike e grupit, duke paralajmëruar se Elbasani do të paraqitet agresiv dhe Partizani duhet t'i përgjigjet me forcë e disiplinë taktike, pa u treguar të butë. Sa i përket fizionomisë së vërtetë të skuadrës së tij, trajneri kroat pranoi se fokusi aktualisht është vetëm te ndeshja e nesërme. Ai premtoi se pas ndërprerjes së kampionatit për shkak të ndeshjeve të ekipeve kombëtare, Partizani do të ketë një fytyrë tjetër. Në mbyllje, Karoglan dha një mesazh qetësie për ambientin, duke siguruar se as ai dhe as klubi nuk janë kapluar nga paniku, ndërsa u kërkoi lojtarëve të shfaqin grintë, krenari dhe të mbrojnë me dinjitet ngjyrat e klubit pa pasur frikë nga asnjë sfidë.