Tragjedia në Vitomiricë, Kurti vendos afat prej 54 orësh për Sveçlën dhe Gërvallën: Kërkoj raport të detajuar për çdo dështim institucional

Kryeministri i vendit, Albin Kurti, ka reaguar publikisht lidhur me vrasjen tronditëse të Arlinda Zekajt në Vitomiricë, gjatë një vizite të zhvilluar sot në Klinikën e Kardiologjisë në Qendrën Klinike Universitare të Kosovës (QKUK). Duke iu përgjigjur pyetjeve të gazetarëve se kush do t'i mbrojë qytetarët, ai ka kërkuar llogaridhënie të menjëhershme nga institucionet përgjegjëse. Në fjalën e tij, kreu i ekzekutivit i ka shprehur ngushëllimet më të sinqerta familjes Zekaj, duke theksuar se kjo ngjarje e rëndë ka shkaktuar tronditje të thellë jo vetëm te të afërmit, por te mbarë shoqëria, e cila po kërkon drejtësi. Kurti ka vënë theksin te nevoja urgjente për reformim rrënjësor të sistemit të drejtësisë, duke kujtuar se raportet e Bashkimit Evropian ndër vite, prej më shumë se një dekade, kanë adresuar kritika të vazhdueshme pikërisht në këtë fushë. Sipas kryeministrit, sistemi i drejtësisë në vend ka nevojë urgjente për t'u vënë në shinat e duhura, duke respektuar rolet përkatëse: hetimin prej hetuesve, ngritjen e aktakuzave nga prokurorët dhe gjykimin nga gjykatësit. Ai ka shtuar se kjo çështje tashmë nuk është thjesht e rëndësishme, por jetike dhe urgjente. Në këtë kuadër, Kurti ka bërë të ditur se i ka lënë Ministrisë së Drejtësisë dhe Ministrisë së Punëve të Brendshme një afat prej 54 orësh për të dorëzuar një raport shterues. Ky raport, sipas tij, duhet të sqarojë plotësisht rrethanat e rastit, të identifikojë dështimet e secilës hallkë të zinxhirit institucional, si dhe të adresojë fatin e rasteve të ngjashme ku gratë viktimë të dhunës vazhdojnë të mbeten të rrezikuara nga keqbërësit.