Zbardhja e tragjedisë së Arlinda Zekajt: Nagavci kërkon themelimin e Komisionit Hetimor Parlamentar

Shefja e Grupit Parlamentar të Lëvizjes Vetëvendosje, Arbërie Nagavci, ka ndërmarrë hapin zyrtar për nisjen e një Komisioni Hetimor Parlamentar, i cili do të vërë në lupë reagimin dhe dështimet e mundshme të organeve shtetërore në mbrojtjen e Arlinda Zekajt. Përmes një publikimi në rrjetet sociale, Nagavci ka bërë të ditur se ky mekanizëm hetimor do të analizojë me detaje çdo hap dhe vendim të institucioneve, duke nisur nga mënyra se si janë trajtuar denoncimet dhe alarmet e dhëna, te vlerësimi i shkallës së rrezikshmërisë, respektimi i urdhrave mbrojtës, si dhe veprimtaria e Policisë, Prokurorisë dhe gjykatave. “Komisioni, me mandat gjashtëmujor, do të hetojë veprimet dhe mosveprimet e të gjithë zinxhirit institucional përgjegjës për mbrojtjen e jetës dhe sigurisë së Arlinda Zekajt, nga trajtimi i denoncimeve dhe paralajmërimeve te vlerësimi i rrezikut, zbatimi i urdhrave të mbrojtjes dhe veprimet e Policisë, Prokurorisë, gjykatave dhe institucioneve të tjera përgjegjëse. Hetimi do të përfshijë edhe funksionimin e mekanizmave institucionalë për parandalimin dhe trajtimin e dhunës ndaj grave dhe fëmijëve. Brenda 60 ditëve nga themelimi, Komisioni parashihet t'i paraqesë Kuvendit raportin e përkohshëm me gjetjet fillestare dhe masat që kërkojnë veprim të menjëhershëm”, ka deklaruar ajo. Sipas planit të parashikuar, ky komision do të ushtrojë funksionin e tij për një periudhë gjashtëmujore, ndërkohë që brenda dy muajve të parë (60 ditëve) nga dita e themelimit, obligohet t'i dorëzojë Kuvendit një raport paraprak me konstatimet e para dhe hapat urgjentë që duhet të ndërmerren. “Asnjë neglizhencë, vonesë apo mosveprim institucional nuk duhet të mbetet pa u shqyrtuar. Duhet të zbardhet se kush ka pasur detyrimin të veprojë, çfarë veprimesh janë ndërmarrë dhe ku ka dështuar mbrojtja institucionale. Bazuar në gjetjet e hetimit, do të kërkojmë masa konkrete, adresimin e përgjegjësive tek organet kompetente dhe përmirësimin e mekanizmave institucionalë për mbrojtjen e viktimave të dhunës. Institucionet duhet të veprojnë para se të jetë vonë. Heshtja, neglizhenca dhe papërgjegjësia nuk mund të tolerohen!”, ka përfunduar ajo.