Aksion policor në Kavadar: Arrestohet 69-vjeçari, sekuestrohen armë zjarri dhe pajisje ilegale për gjueti

Ministria e Punëve të Brendshme ka bërë të ditur se gjatë ditës së djeshme, më 26 tetor 2026, rreth orës 15:00, efektivët e policisë nga Stacioni Policor për Mbikëqyrje Kufitare Mihajllovë, në bashkëpunim me strukturat e Qendrës Rajonale për Çështje Kufitare – Jug (Reparti për Krim Ndërkufitar, Migracion, të Huaj dhe Riatdhesim) dhe NJPB Kavadar, kanë ndaluar shtetasin J.P. (69) nga Kavadari. Ky operacion është zhvilluar pas një serie masash operative dhe grumbullimit të informacioneve në terren. Me urdhër të gjykatës, autoritetet kanë ndërmarrë bastisje në shtëpinë e tij të pushimit dhe objektet përcjellëse në zonën e njohur si “Vasov Grad”, në periferi të Kavadarit, si dhe në banesën e tij private brenda qytetit. Në njoftimin e policisë thuhet se gjatë kontrollit në shtëpinë e pushimit, i dyshuari ka dorëzuar në mënyrë vullnetare një pushkë gjahu të prodhimit “Zastava”, tre fishekë të kalibrit 12, afërsisht 13 kilogramë mish kaprolli, si dhe nëntë mjete të ndaluara për gjueti, konkretisht kurthe, ku në njërin prej tyre janë konstatuar gjurmë biologjike. Ngjarja është referuar menjëherë te prokurori kompetent. Nga institucionet e rendit kanë njoftuar se pas kompletimit dhe dokumentimit të plotë të provave, ndaj të dyshuarit do të ngrihen kallëzime penale për veprat “Gjueti e paligjshme”, e parashikuar nga neni 228, si dhe “Përpunimi, mbajtja dhe tregtimi i palejuar i armëve dhe lëndëve shpërthyese”, sipas nenit 396 të Kodit Penal.