Protesta e 120-të: Qytetarët kërkojnë dorëheqjen e Ramës dhe hetime nga SPAK

Dita e 120-të e tubimeve kundër qeverisë së kryeministrit Edi Rama është përmbyllur mbrëmjen e sotme mes tymit të flakadanëve dhe një revolte të shtuar të qytetarëve. Protestuesit, të vendosur në kërkesat e tyre, kanë artikuluar akuza të rënda ndaj kreut të qeverisë, duke e cilësuar atë si përgjegjësin kryesor të krimit në vend dhe duke kërkuar largimin e menjëhershëm të tij nga posti. Kjo valë e re pakënaqësie u nxit edhe nga deklaratat e dhëna nga kryeministri Rama në aeroportin e Rinasit, menjëherë pas kthimit të tij nga Shtetet e Bashkuara të Amerikës. Në përgjigje të këtyre komenteve, pjesëmarrësit në protestë theksuan se e vetmja rrugë për qeverinë është përballja me drejtësinë, duke kërkuar ndërhyrjen urgjente të SPAK-ut dhe BKH-së. Tubimi nisi sipas orarit të zakonshëm në orën 19:00, me një marshim drejt godinës së Kryeministrisë, ku për rreth dy orë u mbajtën fjalime të shumta. Qytetarët vunë theksin te skandalet e njëpasnjëshme qeveritare, duke përmendur konkretisht çështjen që përfshin ish-drejtoreshën e SHISH, Vlora Hyseni. Përveç kryeministrit, thirrjet për arrestim u drejtuan edhe ndaj ish-zv.kryeministres Belinda Balluku. Ndërkohë, organizatorët bënë të ditur një zhvillim të ri për datën 3 tetor, ku diaspora shqiptare pritet të zhvillojë një protestë përpara selisë së Komisionit Europian. Qëllimi i këtij organizimi është ndërgjegjësimi i institucioneve ndërkombëtare mbi situatën politike në Shqipëri, duke kundërshtuar negociatat me atë që ata e etiketuan si “koka e krimit”. Pas përfundimit të fjalimeve, turma ka vijuar marshimin nëpër qendër të kryeqytetit, duke kaluar pranë Parlamentit dhe stadiumit “Air Albania”, për t’u rikthyer më pas sërish te bulevardi kryesor përpara Kryeministrisë, shoqëruar nga kore dhe pankarta të ndryshme protestuese.