Sekuestrimi i mbi gjysmë toni droge në Maqitevë: Prokuroria kërkon masën e paraburgimit për dy të dyshuar

Prokuroria Themelore në Prizren, konkretisht Departamenti i Krimeve të Rënda, ka njoftuar se pas hetimeve intensive dhe të vazhdueshme lidhur me zbulimin e rreth gjysmë toni marihuanë në fshatin Maqitevë të Suharekës, ka vënë në pranga dy persona me inicialet M.A. dhe B.A. Të dy dyshohen për përfshirje direkte në veprimtarinë e kultivimit dhe përpunimit të substancave narkotike. Ky operacion vjen si vazhdimësi e aksionit të përbashkët të zhvilluar më 16 shtator 2025 nga Prokuroria Themelore në Prizren dhe Policia e Kosovës, i cili u realizua në një shtallë të vendosur në zonën malore të Maqitevës, ku u bë i mundur zbulimi dhe sekuestrimi i më shumë se gjysmë toni marihuanë. Përveç lëndës narkotike, gjatë atij aksioni autoritetet patën konfiskuar edhe një mori provash materiale, përfshirë një granatëhedhës (mortajë), një raketë krahu, një pushkë gjuetie, municion luftarak, një traktor me rimorkio, mjete e pajisje për kultivim dhe përpunim, pajisje kompjuterike, si dhe prova të tjera. Ndërkaq, organet e akuzës kishin lëshuar urdhër të përkohshëm për ngrirjen dhe sekuestrimin e dy parcelave tokësore në këtë fshat, me sipërfaqe prej 1,963 dhe 1,438 metrash katrorë. Në bazë të kërkesës së dorëzuar nga Prokuroria, të pandehurit M.A. dhe B.A. dyshohet se kanë vepruar në bashkëkryerje me shtetasin F.N., me qëllim të mbjelljes së kanabisit dhe përgatitjes së narkotikëve për tregtim dhe shpërndarje. Me këto veprime, ata akuzohen për kryerjen e veprave penale “Kultivimi i bimës së hashashit, shkurres së kokainës ose bimëve të kanabisit” sipas nenit 272, si dhe “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” nga neni 267 i Kodit Penal të Republikës së Kosovës (KPRK). Lidhur me aspektin e armëmbajtjes pa leje, M.A. dyshohet për veprën penale “Mbajtja në pronësi, kontroll ose posedim të paautorizuar të armëve” (neni 366 i KPRK-së), pasi gjatë kontrollit të banesës së tij më 26 tetor 2026, autoritetet zbuluan dhe konfiskuan një pushkë gjysmëautomatike bashkë me shtatë fishekë. Ndërkohë, edhe ndaj B.A. rëndon akuza për të njëjtën vepër penale të armëmbajtjes pa leje, pasi gjatë kontrollit të kryer në shtëpinë e tij në muajin shtator të vitit 2025, atij iu sekuestrua një pushkë gjuetie njëtytëshe. Në fund, Prokuroria Themelore në Prizren rikonfirmoi vendosmërinë e saj në luftën kundër krimit të organizuar, përkushtimin për forcimin e shtetit të së drejtës dhe sigurimin që çdo shkelës i ligjit të përballet me drejtësinë.