Ndikim kuqezi në Turqi: Tre futbollistë shqiptarë sigurojnë vendin në formacionin e javës

Platforma e njohur e statistikave sportive "Sofascore" ka bërë publike listën e 11 lojtarëve më të dalluar për këtë javë në Superligën e Turqisë, ku spikat prania e fortë e futbollistëve shqiptarë. Në këtë formacion ideal kanë rezervuar një vend tre yje nga trojet shqiptare, të cilët kanë lënë gjurmë me paraqitjet e tyre fantastike në ndeshjet e fundit kampionatore. Emri më i spikatur është padyshim Ernest Muçi, i cili nuk kishte se si të mungonte mes më të mirëve pas një paraqitjeje spektakolare. Ai ishte protagonist absolut në triumfin madhështor 3:4 të Trabzonsporit në transfertë ndaj Rizeporit, duke dhuruar tri asiste vendimtare dhe duke u vlerësuar me notën e lartë 9.3. Përveç Muçit, në listën e prestigjit janë përfshirë edhe dy mbrojtësit e Kombëtares së Kosovës, Albion Gërxhaliu dhe Lumbardh Dellova, të cilët kanë konfirmuar formën e tyre të shkëlqyer. Në vlerësimet e fundit statistikore, Dellova është kuotuar me notën 7.6, ndërsa bashkëkombësi i tij në repartin e prapavijës, Gërxhaliu, është shpërblyer me notën 7.9 për paraqitjen e tij të sigurt në fushë.