Zbardhen lëvizjet e fundit të rreshterit Muhamet Lika dhe autorëve para krimit në Kaçanik

Gjykata Themelore në Ferizaj ka zhvilluar një seancë të re lidhur me vrasjen e rreshterit policor Muhamet Lika, ku janë shpalosur detaje rreth lëvizjeve të viktimës dhe të pandehurve pak minuta para se të ndodhte ngjarja tragjike. Gjatë seancës, dëshmitë dhe provat materiale janë prezantuar nga një hetues i policisë, i angazhuar në Departamentin për Krime të Rënda dhe Krim të Organizuar, duke hedhur dritë mbi dinamikën e momenteve kritike. Kujtojmë se Prokuroria Themelore në Ferizaj kishte dorëzuar aktakuzën zyrtare më 9 janar të këtij viti, duke vënë në bankën e të akuzuarve gjashtë persona të identifikuar me inicialet H.B., R.M., V.Ç., E.L., SH.K. dhe D.G. Sipas dosjes së prokurorisë, ngjarja e rëndë ka ndodhur më 1 prill 2025, rreth orës 23:00, në qytetin e Kaçanikut. Të dyshuarit akuzohen se në bashkëkryerje kanë privuar nga jeta me armë zjarri zyrtarin e Policisë së Kosovës. Hetimet paraprake tregojnë se krimi dyshohet të jetë planifikuar me kujdes para ekzekutimit, ndërsa në këtë ngjarje dyshohet se ka qenë i përfshirë edhe një i mitur.