Përplasje në Komisionin për Ekonomi: Mungesa e kryetares së Autoritetit të Konkurrencës ndez debatin mes pozitës dhe opozitës

Mospajtimet rreth rendit të ditës kanë shkaktuar debate të ashpra mes deputetëve në mbledhjen e sotme të Komisionit për Ekonomi. Shkak i kësaj përplasjeje u bë vendimi i kryetares së Autoritetit të Konkurrencës, Neime Binaku, e cila ka anuluar raportimin e parashikuar para këtij trupi parlamentar. Kjo situatë ka ndarë anëtarët e komisionit; opozita ka këmbëngulur që të hapë diskutimin mbi situatën aktuale dhe funksionimin e këtij institucioni, ndërkohë që përfaqësuesit e mazhorancës kanë kërkuar që puna të vijojë me pikat e tjera të parapara. Kryetari i komisionit, Arben Mustafa, ka bërë të ditur se zonja Binaku fillimisht kishte konfirmuar praninë e saj, por më pas është tërhequr duke refuzuar pjesëmarrjen. Ai e ka cilësuar si mjaft të rëndë gjendjen aktuale brenda Autoritetit të Konkurrencës. "Që nga muaji maj i vitit 2025 nuk ka ftuar asnjë mbledhje të komisionit pavarësisht se komisioni ka kourumin me anëtarët e zgjedhur", ka deklaruar Mustafa gjatë mbledhjes. Nga ana tjetër, reagimi ka ardhur nga anëtari i komisionit nga radhët e LVV-së, Taulant Kelmendi, i cili ka theksuar se puna e komisionit duhet të ecë para, pavarësisht mungesës së raportimit nga ana e kryetares së këtij institucioni. Sipas Kelmendit, në bazë të njoftimit me e-mail që Neime Binaku i ka dërguar komisionit, ajo ka munguar për arsye objektive, prandaj çdo debat i tillë duhet të zhvillohet vetëm në prani të përfaqësuesve të Autoritetit të Konkurrencës. Nevoja për të trajtuar dhe diskutuar këtë çështje urgjentisht që në mbledhjen e sotme është mbështetur fuqimisht edhe nga anëtari i LDK-së, Ermal Sadiku, si dhe ai i Aleancës, Burim Ramadani.