Operacion në SHBA: Arrestohet 56-vjeçari shqiptar, dyshohet për krime seksuale ndaj të miturve

Autoritetet amerikane të imigracionit (ICE) në Boston kanë konfirmuar arrestimin e një shtetasi shqiptar, 56-vjeçarit Hasan Billa, banues në Wolcott. Prangosja e tij u realizua më 3 shtator, në kuadër të një operacioni të gjerë për zbatimin e ligjit në këtë zonë. Sipas njoftimit zyrtar, Billa qëndronte në mënyrë të paligjshme në Shtetet e Bashkuara dhe ndaj tij rëndojnë akuza të rënda, të cilat burojnë nga një operacion i fshehtë i zhvilluar më 28 maj në Hartford, i përqendruar në luftën kundër shfrytëzimit të fëmijëve. Hetimet paraprake të kryera nga Policia e Hartfordit dhe Task Forca e FBI-së për Krimet kundër Fëmijëve dhe Trafikimin e Qenieve Njerëzore, kanë ngritur akuza për tentativë të krimit të sulmit seksual të shkallës së dytë, tentativë për abuzim seksual të një të mituri, si dhe rrezikim të lëndimit përmes kontaktit seksual me një viktimë nën moshën 16 vjeç. Në operacionin e muajit maj, një detektiv i infiltruar kishte krijuar një profil të rremë në internet, duke u prezantuar si një 15-vjeçare. Billa, së bashku me dy persona të tjerë, kishte udhëtuar drejt një hoteli në Brainard Road në Hartford, me qëllim takimin e personit që besonin se ishte i mitur. Të tre të dyshuarit u ndaluan në atë kohë pa incidente, ndërsa gjykata caktoi një garanci pasurore prej 500,000 dollarësh për secilin. Ndonëse në raportimet fillestare të qershorit identiteti i tij u referua si Billa Hasan, dokumentet e mëvonshme të ICE e identifikuan atë si Hasan Billa. Zyrtarisht, ai mbetet nën akuzë dhe ende nuk është shpallur fajtor nga gjykata për pretendimet e ngritura. Pas arrestimit të fundit në shtator, ICE njoftoi se procedurat ndaj 56-vjeçarit janë në vijim, ndërsa nuk janë bërë ende publike detaje mbi statusin e tij specifik të emigracionit apo hapat e ardhshëm për dëbimin e mundshëm. Autoritetet amerikane ftojnë qytetarët që disponojnë informacione mbi krimet ndaj të miturve të bashkëpunojnë me Policinë e Hartfordit, duke garantuar anonimitetin.