Në qendër të vëmendjes: Administrata e Trump shqyrton Viktor Orbánin për drejtimin e OKB-së

Përfaqësues të administratës së presidentit amerikan Donald Trump po analizojnë mundësinë e propozimit të ish-kryeministrit hungarez Viktor Orbán për postin e lartë të sekretarit të përgjithshëm të Kombeve të Bashkuara. Ky plan, sipas njoftimeve mediatike, mund të sigurojë mbështetjen e përbashkët të Shteteve de Bashkuara, Rusisë dhe Kinës, ndonëse deri në këtë fazë nuk është marrë ende një vendim përfundimtar dhe fati i kandidaturës mbetet i paqartë. Sipas informacioneve nga mediat ndërkombëtare, burime brenda tri fuqive të mëdha kanë konfirmuar se rrethi i Trump po e shikon pozitivisht idenë që Orbán të jetë një kandidaturë konsensuale mes Uashingtonit, Moskës dhe Pekinit. Një zyrtar i lartë i Departamentit amerikan të Shtetit pranoi se një nismë e tillë mund të duket e papritur në shikim të parë, por bisedimet e deritanishme sugjerojnë se Kina dhe Rusia mund t'i japin dritën jeshile. “Nëse Shtetet e Bashkuara, Rusia dhe Kina duan të njëjtën gjë në Këshillin e Sigurimit të OKB-së, zakonisht arrijnë ta realizojnë”, theksuan zyrtarë amerikanë dhe të një shteti tjetër. Kujtojmë se Orbán humbi pushtetin gjatë zgjedhjeve parlamentare në Hungari në muajin prill, pasi u mposht nga partia Tisza e drejtuar nga Péter Magyar. Kjo humbje i dha fund një periudhe 16-vjeçare të qeverisjes së tij me shumicë absolute. Politikat e tij konservatore të krahut të djathtë, kundërshtimi i rreptë ndaj emigracionit, qëndrimi euroskeptik dhe akuzat për minimin e shtetit ligjor në Hungari kishin sjellë ftohje në raportet me partnerët perëndimorë, përfshirë Bashkimin Evropian dhe NATO-n. Megjithatë, ai kishte ruajtur marrëdhënie të ngushta me Donald Trump, Vladimir Putin dhe Xi Jinping. Pas largimit të tij nga pushteti, organet e drejtësisë hungareze kanë nisur hetime intensive për korrupsion dhe mashtrim ndaj disa ish-bashkëpunëtorëve të qeverisjes së tij. Dy ish-ministra dhe ish-guvernatori i Bankës Kombëtare të Hungarisë janë tashmë të arrestuar, ndërsa autoritetet po verifikojnë nëse ka pasur përfshirje të mundshme të vetë Orbánit në këto skandale. Nga ana e tyre, Shtëpia e Bardhë dhe Pekini nuk kanë bërë ndonjë konfirmim zyrtar lidhur me këto zhvillime. Ndërkaq, zëvendësministri i Jashtëm rus, Aleksandr Alimov, ka deklaruar se as SHBA-ja, as Rusia dhe as Kina nuk kanë ndërmend ta propozojnë Orbánin, duke kujtuar se anëtarët e përhershëm të Këshillit të Sigurimit nuk venë në listë kandidatë për këtë post. “As Rusia, as Shtetet e Bashkuara dhe as Kina nuk do ta propozojnë Orbánin, sepse jemi anëtarë të përhershëm të Këshillit të Sigurimit të OKB-së dhe nuk emërojmë kandidatë për këtë post”, u shpreh Alimov për agjencinë Interfax. Ai shtoi se nëse këto raportime janë të vërteta, nismëtarët duhet të gjejnë një shtet tjetër që do ta zyrtarizojë emrin e tij, ndërsa Rusia do të shqyrtojë çdo person që nominohet sipas rregullave zyrtare. Më herët, përfaqësues të zyrës së Orbánit i kishin cilësuar si “lajme të rreme” zërat për një kandidim të mundshëm të tij për postin e zëvendëssekretarit të përgjithshëm të OKB-së. Në muajin maj, buletini hulumtues VSquare vuri në dukje se një angazhim në Kombet e Bashkuara do t'i siguronte Orbánit imunitetin e nevojshëm diplomatik. Sipas analizave të mediave të huaja, ai do të pranonte garën vetëm nëse do të kishte garanci të plota për fitoren, një epilog që aktualisht duket mjaft i vështirë për t'u arritur. Për t'u zgjedhur në këtë funksion, një kandidat duhet të marrë domosdoshmërisht mbështetjen e të paktën nëntë anëtarëve të Këshillit të Sigurimit, ndërkohë që pesë anëtarët e përhershëm — Shtetet e Bashkuara, Rusia, Kina, Franca dhe Mbretëria e Bashkuar — kanë fuqinë e vetos.