Rrjedhje skandaloze e fituesve të Topit të Artë 2026? Publikohen gabimisht emrat e Yamal, Mbappé dhe Kane

Ceremonia e ndarjes së çmimit prestigjioz "Topi i Artë 2026" është përfshirë nga polemika të forta, pasi në platformat zyrtare të lidhura me këtë ngjarje janë shfaqur papritur artikuj që paralajmërojnë fituesit e këtij edicioni. Bëhet fjalë për tri shkrime të ndryshme, secila prej të cilave kurorëzon si fitues të trofeut një futbollist tjetër: Harry Kane, Kylian Mbappé dhe Lamine Yamal. Këto publikime, të cilat qëndruan online për një periudhë kohe, u përhapën me shpejtësi të jashtëzakonshme në rrjetet sociale dhe mediat sportive anembanë botës, duke ngritur dyshime të forta se emri i fituesit mund të jetë zbuluar para kohe. Në shkrimin kushtuar sulmuesit të Real Madridit, Kylian Mbappé, theksohej se triumfi në një Kampionat Botëror me shifra rekord dhe një tjetër sezon fantastik me fanellën e klubit madrilen i kishin dhënë francezit Topin e parë të Artë në karrierë. Nga ana tjetër, materiali që fliste për talentin e Barcelonës, Lamine Yamal, sugjeronte se në moshën vetëm 19-vjeçare, ylli spanjoll ishte shndërruar në fituesin më të ri në histori të këtij çmimi të krijuar në vitin 1956. Po ashtu, kapiteni i Bayern Munich dhe i Anglisë, Harry Kane, figuronte si fitues në një nga publikimet e tjera, duke krijuar një situatë konfuze me tre pretendentë të ndryshëm për të njëjtin trofe. Sipas raportimeve nga “Daily Mail Sport”, drejtuesit dhe organizatorët janë tronditur nga ky incident dhe kanë nisur menjëherë një hetim të detajuar për të identifikuar përgjegjësit dhe për të ndërmarrë masa disiplinore. Menjëherë pas përhapjes së lajmit, materialet në fjalë u fshinë nga faqet zyrtare, një veprim që ka shtuar edhe më shumë misterin dhe pikëpyetjet mbi ngjarjen e ndodhur në prag të ceremonisë. Pavarësisht kësaj fshirjeje dhe hutive të krijuara, vetë publikimi i këtyre artikujve nuk përbën një konfirmim zyrtar se ndonjëri prej tre lojtarëve është kurorëzuar realisht si më i miri i vitit.