Tragjedia në Pejë, deputeti Musliu në fjalimin e parë në Kuvend ngre alarmin për dhunën ndaj grave dhe mentalitetin patriarkal

Deputeti i Lëvizjes Vetëvendosje, Osman Musliu, e ka nisur fjalimin e tij të parë në Kuvendin e Kosovës me një apel të fortë kundër dhunës me bazë gjinore, duke iu referuar vrasjes tronditëse të Arlinda Zekajt në qytetin e Pejës. Gjatë seancës plenare, ligjvënësi u shpreh se kishte dëshiruar që debutimi i tij në foltoren e parlamentit të shoqërohej me zhvillime pozitive për vendin, e jo me një ngjarje kaq të rëndë që ka tronditur opinionin publik. Musliu ka vënë theksin te nevoja urgjente për ndryshimin e qasjes ndaj gruas në shoqëri, duke kritikuar ashpër mentalitetin e vjetëruar ku bashkëshortja trajtohet si pronë e jo si partnere e barabartë. “Ajo nuk është pronë, është dashuria, bashkëshortja, nëna e fëmijëve tanë. Disa burra, bashkëshorten ende e shohin si pronë, jo si shoqe të jetës”, deklaroi ai para deputetëve. Sipas tij, emancipimi i shoqërisë dhe liria e plotë e grave në familje, në rrugë apo në ambientet e punës mbetet ende një sfidë e pambyllur, e cila kërkon angazhim kolektiv. “Me ndryshu mentalitetin, duhet ta dimë se ky mentalitet fillon me ndryshu në familje, në shkolla, në kisha, xhamia, në punë, kudo”, shtoi tutje deputeti. Për të ilustruar peshën dhe rolin e pazëvendësueshëm të gruas, Musliu solli në vëmendje një shembull nga tradita islame dhe jeta e profetit Muhamed, duke kujtuar respektin e theksuar që i kushtohej bashkëshortes si mbështetja kryesore e njeriut. “Pejgamberi herën e parë kur ka qajtë, dhe e ka quajtur viti i dëshpërimit ka qenë viti kur i ka vdekur bashkëshortja, ai ka thënë: ka qenë shoku më i ngushtë i jetës”, përfundoi fjalimin e tij zyrtari i Vetëvendosjes.