Tentoi të fuste 17 emigrantë në Britani me jaht, dënohet peshkatari shqiptar

Një 58-vjeçar me origjinë shqiptare është shpallur fajtor nga drejtësia britanike pasi u kap duke u përpjekur të kalonte ilegalisht 17 emigrantë nga Franca drejt Mbretërisë së Bashkuar në bordin e një jahti. Sipas të dhënave nga Agjencia Kombëtare e Krimit (NCA), i pandehuri Eno Gajda ra në pranga më 27 gusht gjatë një operacioni të forcave të Sigurisë Kufitare pranë brigjeve të Dorset, ndërsa hetimet e mëtejshme iu besuan efektivëve të agjencisë. Sipas rindërtimit të ngjarjes nga organet ligjzbatuese, Gajda kishte nisur lundrimin me një mjet lundrues 40 këmbë të gjatë nga porti francez i Dielette, me synim brigjet afër Portlandit. Jahti u lokalizua dhe u bllokua në det të hapur nga autoritetet e kufirit, të cilët e orientuan më pas drejt portit të Portland Marina. Në bordin e tij u gjetën dhe u zbritën 17 persona, konkretisht 16 shtetas të rritur nga Shqipëria dhe një i mitur. Pas arrestimit, 58-vjeçari u ballafaqua me akuzën e ndihmës për kalimin e paligjshëm të kufirit dhe gjatë seancës së datës 26 tetor në Gjykatën e Kurorës në Bournemouth, ai pranoi fajësinë. Ai pritet të mësojë masën përfundimtare të dënimit më 18 nëntor në të njëjtën sallë gjyqi. Duke komentuar rastin, zyrtari i lartë i NCA-së, Andy Tickner, u shpreh se kalimi i emigrantëve përmes një prej zonave detare me qarkullimin më të madh në glob përbënte një sipërmarrje tejet të rrezikshme që rrezikoi drejtpërdrejt jetët e njerëzve në bord. Nga ana e tij, Charlie Eastaugh, drejtor i operacioneve detare dhe mjeteve të vogla në Komandën e Sigurisë Kufitare, ritheksoi se strukturat shtetërore do të vazhdojnë aksionet e përbashkëta për të shkatërruar grupet kriminale që merren me trafikimin e qenieve njerëzore. Autoritetet britanike bënë me dije se frenimi i krimit të organizuar që ushqehet nga emigracioni i paligjshëm mbetet prioritet absolut, ndërkohë që aktualisht po zhvillohen mbi 100 hetime aktive ndaj personave dhe rrjeteve të dyshuara në këtë fushë.