Tragjedia në Pejë, deputeti Tahiri kërkon dorëheqje dhe shkarkime institucionale: Ngushëllimet nuk mjaftojnë

Deputeti i Aleancës për Ardhmërinë e Kosovës, Besnik Tahiri, ka kërkuar llogaridhënie konkrete dhe shkarkime pas vrasjes tragjike të Arlinda Zekajt, duke e cilësuar këtë si një standard minimal etik dhe institucional përballë një ngjarjeje që ka tronditur mbarë opinionin publik. Gjatë fjalës së tij në Kuvendin e Kosovës, Tahiri vlerësoi se humbja e jetës së Arlindës nuk përbën një rast të izoluar, por dëshmon një dukuri alarmante që kërkon përgjegjësi të rreptë shtetërore. “Pa asnjë dyshim, vrasja e Arlindës është një tragjedi që na ka tronditur të gjithëve, por nuk është rast i veçuar. Fatkeqësisht, është duke u bërë një fenomen i cili në Kosovë na obligon të reflektojmë dhe, mbi të gjitha, të kërkojmë përgjegjësi”, u shpreh ai. Sipas ligjvënësit opozitar, deklaratat e zakonshme ngushëlluese dhe reagimet protokollare nuk mjaftojnë më për të adresuar krizën e sigurisë, ndaj janë të nevojshme veprime të menjëhershme nga autoritetet. “Sot do të duhej të kishte dorëheqje, shkarkim, si veprim etik ndaj një ngjarjeje e cila u shkaktoi dhimbje të gjithë qytetarëve të Kosovës”, deklaroi Tahiri. Në përmbyllje, ai nënvizoi se dhuna me bazë gjinore nuk duhet parë thjesht si një dukuri e veçantë apo vetëm në dimensionin e femicidit, por ajo kërkon domosdoshmërisht edhe matjen e përgjegjësisë institucionale të strukturave përgjegjëse.