CNN: SHBA-ja mund të ndërmarrë sulm masiv ndaj Iranit brenda 96 orëve nga urdhri i Trump

Strukturat ushtarake amerikane të vendosura në Lindjen e Mesme janë vënë në gatishmëri të lartë për të ndërmarrë operacione të reja luftarake, të cilat mund të jenë me përmasa të gjera kundër Iranit, brenda një afati prej 96 orësh pas marrjes së dritës jeshile nga presidenti Donald Trump. Këto zhvillime janë konfirmuar për CNN nga dy burime zyrtare brenda administratës amerikane, të cilat theksuan se në terren tashmë është pozicionuar një numër i mjaftueshëm trupash dhe pajisjesh për të përmbushur këtë mision. "Do të jetë një operacion serioz," u shpreh njëri prej zyrtarëve për rrjetin amerikan. Një qëndrim i tillë mbështetet edhe nga zyrtarë të tjerë aktualë dhe të mëparshëm që janë njohur nga afër me skenaret e fshehta ushtarake. Disa syresh vlerësojnë se çështja nuk qëndron te fakti nëse kreu i Shtëpisë së Bardhë do të urdhërojë apo jo sulmin, por se kur do të ndodhë kjo. Ata sugjerojnë se ndërhyrja mund të konkretizohet në çdo moment para mbylljes së këtij viti, megjithëse skenari më i mundshëm mbetet ai pas përfundimit të zgjedhjeve afatmesme në Shtetet e Bashkuara. Sipas burimeve, Trump ende nuk ka marrë një vendim përfundimtar për hapat që do të ndërmarrë pas zgjedhjeve, ndonëse paraprakisht duket se po anon drejt nisjes së veprimeve madhore ushtarake. Megjithatë, ata shtuan se në të kaluarën kreu i shtetit ka shfaqur prirjen për të ndërmarrë iniciativa që më pas i ka anuluar. "Departamenti është një organizatë planifikimi dhe puna jonë është të zhvillojmë dhe zbatojmë opsione ushtarake që presidenti urdhëron," deklaroi një zyrtar i lartë i Pentagonit. Në anën tjetër, raportet më të fundit të shërbimeve sekrete amerikane dëshmojnë se Teherani dhe rebelët Huthi e vlerësojnë me shqetësim të lartë rrezikun e një agresioni të ri nga ana e Shteteve të Bashkuara dhe ndoshta e Izraelit, fakt ky i konfirmuar edhe nga dy burime të tjera të informuara mbi dinamikën në rajon. Analiza e inteligjencës parashikon se, nëse Uashingtoni dhe Tel Avivi nisin ofensiva të reja ushtarake, autoritetet iraniane dhe lëvizja Huthi do të kundërpërgjigjen pa vonesë, duke shënjestruar personalin dhe infrastrukturën amerikane në zonë, e ndoshta edhe përtej saj. Gjithsesi, agjencitë e inteligjencës çmojnë se Irani dhe aleatët e tyre nuk pritet të ndërmarrin sulme parandaluese kundër objektivave amerikane apo izraelite në fazën aktuale, por mbeten të gatshëm për të reaguar ashpër nëse forcat e SHBA-së ose Izraelit ndërmarrin hapin e parë luftarak.