A e pret një tjetër krizë Vinicius Juniorin te Real Madridi?

Vinicius Junior po kalon një moment delikat te Real Madridi, ndërkohë që mungesa e tij e detyruar në sfidën e madhe “El Clasico” kundër Barcelonës ka ngritur pikëpyetje të reja lidhur me statusin që do të gëzojë në skemat e trajnerit Jose Mourinho. Sulmuesi nga Brazili u detyrua ta shihte nga tribuna triumfin 2:1 të madrilenëve në “Spotify Camp Nou”, për shkak të një pezullimi prej katër ndeshjesh. Megjithatë, qendrën e vëmendjes e rrëmbeu Yan Diomande, i cili e shfrytëzoi në maksimum mundësinë e dhënë për të treguar potencialin e tij dhe për të rritur ndjeshëm konkurrencën në repartin e sulmit. Forma e shkëlqyer e futbollistit nga Bregu i Fildishtë ka zhvendosur fokusin e diskutimeve, duke bërë që opinionbërësit dhe tifozët të mos fliten vetëm për mungesën e Viniciusit, por edhe për pozicionin që ai do të ketë në skuadër sapo të rikthehet në fushë. Kjo situatë u sjell ndër mend tifozëve tensionet e edicionit të kaluar, kur Vinicius pati një përplasje të hapur me ish-trajnerin Xabi Alonso, pas një zëvendësimi pikërisht në një tjetër “El Clasico”. Gjatë atij takimi, të cilin Real Madridi e fitoi gjithashtu me shifrat 2:1 ndaj Barcelonës, Alonso e nxori nga loja brazilianin në minutën e 72-të, duke e zëvendësuar me Rodrygo Goes. Reagimi i Viniciusit ishte mjaft i ashpër, pasi fillimisht u drejtua nga dhomat e zhveshjes para se të kthehej sërish në bankinë. Pas këtij episodi pasuan javë të tensionuara mes lojtarit dhe strategut spanjoll. Paralelisht me këtë, performanca e Viniciusit pësoi rënie, ndërsa klubi mbretëror e mbylli sezonin duarthatë për të dytin vit me radhë. Tani, teksa Diomande po fiton gjithnjë e më shumë hapësirë, ylli brazilian përballet me një provë të vështirë për të konfirmuar peshën e tij specifike në projektin teknik të Jose Mourinhos. Madje, lëvizjet e fundit taktike të trajnerit portugez kanë ushqyer edhe më shumë spekulimet. Mourinho e ka zëvendësuar Viniciusin në dy ndeshjet e fundit të Ligës së Kampionëve: në minutën e 59-të ndaj Romës dhe në minutën e 70-të kundër Leipzigut. Këto vendime kanë hapur debat nëse tekniku portugez po synon t'i besojë brazilianit një rol krejtësisht ndryshe nga ai me të cilin jemi mësuar gjatë sezoneve të fundit. Përfaqësuesi i Selecaos tani ka përpara një mision të dyfishtë: jo vetëm të rikthehet në fushë, por edhe të rimarrë vendin e padiskutueshëm në formacionin bazë. Nga ana tjetër, Diomande duket i vendosur të kapë çdo shans për t'i dëshmuar trajnerit se e meriton fanellën e titullarit. Mbetet për t'u parë nëse historia do të përsëritet dhe ky “El Clasico” do të paralajmërojë një stinë të re trazirash për sulmuesin, apo nëse Vinicius do të përgjigjet në fushë, duke e kthyer këtë konkurrencë në avantazhin e tij.