Mourinho thumbon tifozët e Barcelonës: Fitoren ua dedikoj atyre që nuk më lanë të flija në hotel

Real Madridi ka triumfuar me rezultatin 2-1 në udhëtim ndaj Barcelonës në “Camp Nou”, duke regjistruar një fitore me peshë të madhe në supersfidën e futbollit spanjoll. Në prononcimin e dhënë pas përfundimit të “El Clasico”-s, trajneri portugez Jose Mourinho ka tërhequr vëmendjen me një deklaratë ironike drejtuar mbështetësve katalunas. “Fitoren ia dedikoj tifozëve të Barcelonës, të cilët nuk më lanë të flija në hotel sot. Nuk munda ta bëja gjumin e pasdites, por e munda ekipin e tyre. Një përqafim të madh për ta”, u shpreh strategu portugez për televizionin zyrtar të klubit, Real Madrid TV. Në aspektin sportiv, Kylian Mbappe ka qenë njeriu i ndeshjes për madrilenët, duke gjetur dy herë rrugën e rrjetës në minutat 41’ dhe 87’. Ndërkohë, për vendasit shënoi Raphinha në minutën e 61-të, duke barazuar përkohësisht shifrat në 1-1. Pjesë e kthesës në fushë ishte edhe Eduardo Camavinga, i cili u fut si zëvendësues në minutën e 80-të në vend të Bernardo Silvës. Mesfushori francez pati ndikim të menjëhershëm, duke shërbyer në mënyrë perfekte te goli i fitores i shënuar nga Mbappe. Gjatë festës së golit pranë tribunës vendase, u krijua një situatë e tensionuar kur Camavinga dhe shokët e jo skuadrës u gjendën pranë tifozëve kundërshtarë, ndërsa disa flamuj të Barcelonës u panë të valëviteshin rrezikshëm pranë kokës së francezit. Për të shmangur ndonjë përshkallëzim të mundshëm të situatës, ka ndërhyrë menjëherë Aurelien Tchouameni, i cili ka mbrojtur bashkëkombësin e tij dhe ka larguar lojtarët e Real Madridit nga zona e rrezikut pranë tifozëve vendës. Për ekipin e drejtuar nga Hansi Flick, kjo ishte humbja e parë në këtë edicion të kampionatit, pas një ecurie prej nëntë fitoresh radhazi në nëntë ndeshjet e para. Në anën tjetër, ky sukses i Real Madridit ka frenuar shkëputjen e katalunasve, të cilët rrezikonin të krijonin një epërsi prej nëntë pikësh. Pas kësaj jave, madrilenët ngjiten në vendin e tretë me tri pikë më pak se Barcelona, ndërsa Atletico Madridi ndodhet në pozitën e dytë.