Aksioni “derë më derë” i Kadastrës: Mbi 1500 banesa të regjistruara në Himarë, Finiq e Leskovik

Agjencia Shtetërore e Kadastrës (ASHK) ka intensifikuar aksionin e saj në terren, duke zbatuar metodologjinë e verifikimit “derë më derë” në disa rajone të vendit me qëllim zgjidhjen e ngërçeve me dokumentacionin e pronave. Në zonat e Palasës dhe Iliasit në Himarë janë regjistruar rreth 1000 banesa, ndërkohë që dhjetëra dosje po kalojnë në fazën e tyre përfundimtare të shqyrtimit. Për lehtësimin e qytetarëve, ASHK ka vënë në dispozicion një sistem online ku banorët mund të kontrollojnë dokumentet që u mungojnë. Der më tani, institucioni ka nxjerrë 22 vendime përfundimtare, kurse 38 shtëpi ndodhen në hapësirën e fundit procedurale të afishimit publik. Sipas njoftimit, 55 subjekte duhet të dorëzojnë letrat e munguara në Drejtorinë Vendore të ASHK-së në Vlorë. Listat emërore dhe dokumentacioni specifik janë bërë publike në faqen zyrtare të ASHK-së, duke i orientuar qytetarët për hapat e mëtejshëm. Prej kësaj të hëne, nisma është zgjeruar edhe në fshatrat Kallarat, Vranisht, Bolenë, Tërbaç dhe Kuç të bashkisë së Himarës, për të vijuar me skanimin e territoreve dhe trajtimin e çështjeve në përputhje me dispozitat ligjore. Njëkohësisht, ekipet e specialistëve kanë shtrirë operacionet edhe në Bashkinë Finiq. Pas përfumimit të regjistrimit në terren në gjashtë fshatrat e para të Njësisë Administrative Finiq, ku u konstatuan 150 shtëpi, puna ka vazhduar në 10 fshatra të Njësisë Administrative Aliko. Paralelisht, grupet e terrenit po operojnë në Velabisht të Beratit, në Leskovik ku janë evidentuar rreth 250 banesa, si dhe në fshatin Kus të Kasharit. Aktualisht, kjo strategji e re e Kadastrës po zbatiohet në 30 fshatra të ndryshme të vendit, me synim identifikimin e banesave, shpejtimin e procedurave dhe mbështetjen e qytetarëve për plotësimin e dosjeve të tyre. Nëpërmjet kësaj qasjeje, ASHK synon të jetë më afër banorëve, duke kapërcyer burokracinë, duke evidentuar në vend sfidat e pronësisë dhe duke i udhëzuar qytetarët drejt zgjidhjes përfundimtare të procedurave. Komunikimi i drejtpërdrejtë dhe kontrolli rigoroz në terren përbëjnë shtyllën kurrizore të këtij procesi, duke garantuar që çdo dosje të trajtohet në mënyrë individuale sipas provave dokumentare dhe kritereve ligjore në fuqi.