Cancelo pas disfatës në El Clasico: Dominuam Realin, por nuk ditëm t'i konkretizojmë rastet

Mbrojtësi i Barcelonës, João Cancelo, ka analizuar humbjen e pësuar nga Real Madridi në derbin e madh spanjoll, duke theksuar se skuadra katalanase shfaqi epërsi në fushë, por vuajti mungesën e finalizimit të rasteve të krijuara. “Ne ishim superiorë, por ky është Real Madridi. Ata kanë pak raste dhe shënojnë gola. Në përgjithësi, mendoj se ishim skuadër më e mirë, por duhet të reagojmë”, u shpreh portugezi pas përfundimit të ndeshjes. Futbollisti i krahut pranoi hapur se ekipi i tij çedoi në aspektin e kontrollit të ritmit përmes zotërimit të topit, një element ku katalanasit nuk arritën të shprehen në nivelin e kërkuar gjatë 90 minutave. “Ka raste kur duam të bëjmë presion lart, por ka edhe momente kur duhet ta kontrollojmë më shumë ndeshjen me topin, sepse aty jemi të mirë. Duhet ta mbajmë më shumë topin, ta qarkullojmë dhe të krijojmë raste. Na mungoi kjo, megjithëse patëm më shumë raste se Madridi”, shtoi ai. Duke parë përpara, mbrojtësi bëri thirrje për mobilizim urgjent të grupit para duelit të radhës në La Liga kundër Alavesit, duke shprehur besim të plotë te motivimi i shokëve të tij të skuadrës. “Tani duhet të punojmë. Djemtë janë të motivuar për t’u përgjigjur ndaj Alavesit dhe këtë do ta bëjmë”, theksoi tutje ai. Në një prononcim shtesë dhënë për DSports, Cancelo e cilësoi rezultatin si shumë të dhimbshëm, teksa pranoi se gjatë fraksionit të parë të lojës Barcelona pati vështirësi në qarkullimin e topit dhe shfaqi ngutje në pasimet vendimtare për të çarë prapavijën kundërshtare. “Kur humbim, nuk është gjithçka keq dhe kur fitojmë, nuk është gjithçka mirë. Prandaj do të reagojmë”, përfundoi ai, duke kërkuar që skuadra të mbetet e bashkuar dhe të ruajë vetëbesimin pavarësisht furi së kritikave. Përballja në Camp Nou u mbyll me fitoren 2-1 të Real Madridit falë dy golave të shënuar nga Kylian Mbappe, duke i shkaktuar Barcelonës humbjen e parë të këtij sezoni në kampionat, pavarësisht se Raphinha realizoi për vendasit.