Tragjedia në Pejë: Prokuroria zbardh lëvizjet institucionale dhe orët e fundit para vrasjes së Arlinda Zekajt

Prokuroria Themelore në Pejë ka publikuar detaje zyrtare rreth veprimeve të ndërmarra nga institucionet shtetërore në periudhën para vrasjes së Arlinda Zekajt, duke hedhur dritë mbi mënyrën se a u trajtuan kërkesat e saj, vendimet e gjykatave, si dhe angazhimin e Policisë së Kosovës dhe prokurorëve gjatë atyre ditëve kritike. Sipas komunikatës zyrtare, më 22 tetor 2026, kryeprokurorja e këtij institucioni kishte pranuar një shkresë nga e ndjera Arlinda Zekaj. Në këtë kërkesë, ajo kishte ngritur shqetësimet e saj lidhur me mënyrën se si ishin trajtuar rastet e kaluara, duke kërkuar angazhim institucional për zbatimin e një urdhri gjyqësor. Pas shqyrtimit të rrethanave të ngritura, kryeprokurorja kishte përcjellë çështjen te autoritetet kompetente, përfshirë Policinë e Kosovës, Gjykatën Themelore në Pejë, Drejtorinë për Punë dhe Mirëqenie Sociale, Qendrën për Punë Sociale, si dhe Zyrën për Mbrojtje dhe Ndihmë Viktimave. Institucioneve të angazhuara u ishte bërë thirrje që me urgjencë të bënin një vlerësim të terrenit, të verifikonin çdo pretendim për lëshim të mundshëm dhe të ndërmerrnin hapa konkretë konform përgjegjësive të tyre ligjore. Njëkohësisht, kryeprokurorja kishte hapur një rast hetues për të verifikuar nëse veprimet apo pasiviteti i zyrtarëve të përfshirë përbënin elemente të veprës penale të keqpërdorimit të pozitës apo autoritetit zyrtar. Vendimi i gjykatës dhe kërkesa për kthim në shtëpi Referuar dokumentacionit të përfshirë në kërkesën e Arlinda Zekajt, më 16 tetor 2026, gjykata kishte marrë një vendim përmes të cilit urdhërohej ish-bashkëshorti që t'i lejonte asaj kthimin dhe shfrytëzimin e shtëpisë së përbashkët. Krahas kësaj, ishte lëshuar edhe një urdhër mbrojtjeje gjashtëmujor, i cili kishte hyrë në fuqi menjëherë pas nxjerrjes. Në bazë të aktvendimit gjyqësor, detyra për ekzekutimin e këtij urdhri dhe njoftimin e gjykatës për çdo pengesë i takonte Policisë së Kosovës. Prokuroria sqaron se ditën kur viktima kishte kërkuar zbatimin e vendimit për t'u kthyer në banesën e përbashkët, Policia e kishte njoftuar prokurorin kujdestar mbi situatën e krijuar. Duke analizuar rrezikun e mundshëm për integritetin fizik të viktimës, prokurori i shtetit kishte arritur në përfundimin se kthimi i menjëhershëm në atë shtëpi mund t'i rrezikonte jetën. Për të garantuar sigurinë e saj, prokurori kishte ftuar në stacionin policor vëllezërit e viktimës, të cilët ishin njohur hollësisht me situatën. Pavarësisht insistimit të vazhdueshëm të Zekajt për t'u kthyer në shtëpinë e përbashkët, prokurori i shtetit, duke u bazuar te rrethanat dhe rreziku i evidentuar, kishte sugjeruar që ajo të strehohej përkohësisht te familjarët e saj. Me kërkesë të vetë viktimës, prokurori dhe hetuesit policorë kishin përpiluar një procesverbal zyrtar në prani të saj dhe të familjarëve, ku arsyetohej nevoja e qëndrimit te vëllezërit. Pas diskutimeve, viktima kishte rënë dakord të shkonte te familja e saj, por kishte kërkuar që të nesërmen të shoqërohej nga një patrullë e Policisë për t'u kthyer në shtëpi. Gjatë asaj nate, prokurori i shtetit bashkë me hetuesit kishin bërë një vlerësim të ri të shkallës së rrezikut dhe të masave të sigurisë, duke planifikuar hapat e mëtejshëm për kthimin e saj.