Kriza energjetike: Çmimet e gazit në Evropë shënojnë rekordin e katër viteve të fundit

Tregu evropian i energjisë po përballet me një situatë kritike, pasi tarifat e gazit janë ngjitur në kuotat më të larta që nga viti 2022. Shkak për këtë situatë janë bërë shqetësimet në rritje rreth stabilitetit të furnizimit gjatë stinës së dimrit, të shoqëruara me tensionet e vazhdueshme gjeopolitike në Lindjen e Mesme. Gjatë ditës së hënë, çmimet me shumicë të gazit preken shifrën e 97 eurove për megavat-orë. Kjo rritje erdhi pasi temperaturat në të gjithë kontinentin pësuan rënie të ndjeshme, duke detyruar tregtarët të llogarisin një kërkesë dukshëm më të lartë për sistemet e ngrohjes. Përveç faktorëve klimaterikë, pasiguria ushqehet edhe nga frika e ndërprerjeve të reja të dërgesave nga Lindja e Mesme. Kjo vjen pas qarkullimit të raporteve se Shtetet e Bashkuara dhe Izraeli kanë përgatitur strategji për operacione të reja ushtarake kundër Iranit, menjëherë pas zgjedhjeve të mesmandatit në SHBA. Këto zhvillime gjeopolitike ndikuan që të premten çmimi i naftës të ngjitej në 117 dollarë për fuçi. Edhe pse nafta e papërpunuar Brent regjistroi një rënie prej rreth 2% të hënën, ajo vazhdon të mbahet në kuota të larta, mbi 114 dollarë për fuçi. Një tjetër sfidë me të cilën po përballet rajoni është niveli i ulët i rezervave të gazit në prag të muajve të ftohtë. Depozitat evropiane ndodhen në pikën e tyre më të ulët në mbi dhjetë vitet e fundit, si pasojë e zvogëlimit të eksporteve nga Katari dhe e konsumit të shtuar gjatë verës për funksionimin e sistemeve të ftohjes. Aktualisht, magazinat e gazit në Evropë janë të mbushura në masën rreth 75%, krahasuar me mesataren zakonore sezonale që sillet rreth 80%. Pavarësisht kësaj panorame në sektorin energjetik, bursat evropiane të aksioneve shënuan një ecuri lehtësisht pozitive të hënën, të mbështetura nga zbutja e lehtë e çmimit të naftës. Indeksi Stoxx Europe 600, i cili përfshin korporatat më të mëdha të kontinentit, shënoi një rritje prej 0.3% gjatë orëve të para të tregtimit.