Përhapja e fruthit në vend: Tre pacientë të shtrirë në Klinikën Infektive, mjekët bëjnë thirrje për vaksinim

Vendon ynë po përballet me një shtim të dukshëm të infektimeve me fruth, situatë kjo që ka nisur që nga muaji maj. Të dhënat e fundit të bëra publike nga Instituti Kombëtar i Shëndetësisë Publike dëshmojnë se numri i rasteve të konfirmuara ka kaluar shifrën e 170 të prekurve, ndërkohë që specialistët e fushës bëjnë me dije se fluksi shënon të paktën një rast të ri çdo ditë. Drejtoresha e Klinikës Infektive, Vera Berisha Ndrejaj, ka konfirmuar se aktualisht tre persona po marrin trajtim të mjekësor të specializuar brenda këtij institucioni shëndetësor. “Për momentin kemi tre raste të spitalizuar, rastet e tjera janë lëshuar me rekomandim që të kthehen sipas nevojë sepse kanë kaluar fazën e infeksionit e nuk janë më në rrezik dhe ne i testojmë të gjitha rastet të cilat janë të dyshimta dhe sigurisht që të gjitha rastet që kanë nevojë për spitalizim i spitalizojmë”, ka deklaruar ajo. Sipas drejtoreshës së klinikës, pothuajse të gjithë pacientët e prekur nga kjo sëmundje karakterizohen nga mungesa e vaksinimit të mëparshëm. “Pesha e kësaj sëmundje është shumë e rëndë sepse komplikimet janë shumë të rënda, janë të mundshme dhe si sëmundje është shumë kontagjenioze dhe një ambient ku është një pacient i sëmurë me morbill, propabilisht mund të sëmurën të gjithë ata persona që gjenden në atë ambient e që janë të pavaksinuar. Të gjitha rastet që i kemi pasur kanë qenë të pavaksinuar”, u shpreh ajo. Në lidhje me këtë situatë, gazetari i shëndetësisë, Bujar Vitia, ka ngritur alarmin duke kërkuar angazhim më të madh institucional për vetëdijesimin e prindërve dhe imunizimin e detyrueshëm të fëmijëve. “Është shqetësuese dhe e rrezikshme sa i përket shëndetit të fëmijëve tanë, është krejt e pa përgjegjshme nga prindërit që të refuzojnë të i vaksinojnë fëmijët e tyre me vaksinën kundër fruthit sepse në këtë mënyrë e rrezikojnë shëndetin e tyre. Konsideroj që duhet shumë më tepër me pas përpjekje prej institucioneve për me i informuar prindërit, drejt në mënyrë shkencore me argumente shkencore se kjo vaksinë nuk shkakton asnjë efekt anësor”, theksoi Vitia. Në thirrjen e tij, ai ka apeluar që qytetarët të mbështeten te faktet shkencore dhe të mos bien pre e dezinformatave që qarkullojnë rreth sigurisë së vaksinave.