Tragjedia në Pejë, Abdixhiku: Shteti dështoi ta mbronte Arlinda Zekajn, tani i detyrohemi drejtësi

Kryetari i Lidhjes Demokratike të Kosovës (LDK), Lumir Abdixhiku, ka reaguar ashpër pas vrasjes tragjike të Arlinda Zekajt në fshatin Vitomiricë të Pejës, duke kërkuar një hetim të thellë, të plotë dhe të pavarur mbi të gjitha veprimet dhe mosveprimet institucionale që çuan në këtë ngjarje rëndë. Abdixhiku ka bërë të publike faktin se viktima i ishte drejtuar shtetit për ndihmë dhe kishte alarmuar Prokurorinë për rrezikun e madh që i kanosej jetës së saj, vetëm tri ditë para se të ekzekutohej. “Arlinda kërkoi të jetonte. Kërkoi mbrojtje nga shteti. Tri ditë para se të vritej, e paralajmëroi Prokurorinë për rrezikun ndaj jetës së saj”, ka shkruar Abdixhiku në reagimin e tij. Kreu i LDK-së ka shtuar se letra e lëshuar nga e ndjera, e cila tashmë është bërë publike, paraqet dëshminë rrëqethëse të thirrjes së saj të dëshpëruar për ndihmë para se të ndodhte fatkeqësia. “Është e padurueshme të lexosh fjalët e një gruaje që kërkon ndihmë, teksa ndjente pafuqinë e zërit të saj. Ato fjalë godasin secilin prej nesh, si prind, si vëlla, si fëmijë, si bashkëqytetar”, ka deklaruar ai, duke e shoqëruar me mesazhin e saj paralajmërues: “Mos jepni llogari pasi të jetë marrë jeta ime”. Duke vendosur theksin te llogaridhënia, politikani kosovar ka kërkuar përgjegjësi konkrete për secilin zyrtar apo institucion që ka pasur në dorë rastin dhe nuk ka ndërmarrë hapat e duhur për ta shpëtuar atë. “Secili zyrtar e institucion që e ka trajtuar kërkesën e Arlindës duhet të japë llogari për veprimet që ka ndërmarrë dhe detyrimet që ka lënë pa përmbushur. Përgjegjësia duhet të ketë emër e mbiemër”, ka theksuar ai. Në fund të reagimit të tij, duke i shprehur ngushëllime familjarëve të viktimës, Abdixhiku ka përsëritur se dështimi i institucioneve për të ofruar siguri në kohë ka lënë një borxh të pashlyeshëm moral dhe institucional. “Asaj i detyroheshim mbrojtje sa ishte gjallë. Për të gjallë, mbrojtje nuk pati! Tani i detyrohemi drejtësi”, ka përfunduar kreu i LDK-së. Vrasja e Arlinda Zekajt ka shkaktuar një valë indinjate në mbarë vendin, duke ngritur shqetësime serioze për trajtimin e rasteve të rrezikut ndaj jetës së qytetarëve nga organet kompetente. Sipas Policisë së Kosovës, rasti fillimisht ishte paraqitur si dhunë në familje dhe viktima ishte intervistuar në stacionin policor të Pejës, para se të raportohej më vonë se ajo u gjet pa shenja jete në shtëpinë e saj në Vitomiricë. Të dhënat preliminare të hetuesve sugjerojnë se vdekja e saj ka ardhur si pasojë e goditjeve me mjet të fortë, ndërkohë që personi i dyshuar për këtë krim makabër, i cili dyshohet të jetë kunati i viktimës, vazhdon të jetë në arrati, ndërsa autoritetet po vazhdojnë pandërprerë operacionet për zbardhjen e plotë të rrethanave të ngjarjes.