Tragjedia në Jordan: Vihen në pranga tre autorët e sulmit të përgjakshëm që la 9 të vdekur në kishë

Forcat e sigurisë në Jordani kanë vënë në pranga tre të rinj, të cilët dyshohen si autorë të sulmit tronditës ndaj një kishe ortodokse në fshatin Hamoud të provincës së Karakut, ngjarje e cila i mori jetën nëntë personave. Operacioni për kapjen e tyre u finalizua me sukses gjatë orëve të para të mëngjesit, duke çuar në ndalimin e të dyshuarve kryesorë të kësaj ngjarjeje të rëndë kriminale. “Ne i kemi arrestuar vrasësit, po hetojmë të gjitha rrethanat që i shtynë këta të rinj drejt ekstremizmit dhe do të sigurohemi që kushdo që vërtetohet se është i përfshirë të mbahet përgjegjës”, deklaroi përmes një njoftimi në platformën X, Ministri i Brendshëm jordanez, Mazen al-Faraya. Sipas informacionit zyrtar nga Departamenti i sigurisë publike, agresorët kanë depërtuar me dhunë brenda objektit fetar ortodoks, duke qëlluar me armë zjarri në momentin kur aty po mbahej një ceremoni mortore. Mbreti Abdullah II e ka cilësuar ngjarjen si një akt terrorist gjatë një vizite që iu bë të plagosurve të shtruar në spitalin e Karakut. Ai theksoi të premten në rrjetin social X se shteti i Mbretërisë do të tregohet i palëkundur, duke kërkuar ndëshkimin më të rreptë ligjor për autorët. Provinca e Karakut numëron rreth 375,000 banorë dhe strehon një komunitet të konsiderueshëm të besimit të krishterë. Në shkallë kombëtare, të krishterët përbëjnë afërsisht 3% të popullsisë së përgjithshme në Jordaninë me shumicë myslimane sunite. Si shenjë solidariteti dhe respekti për viktimat, autoritetet shtetërore shpallën tre ditë zie zyrtare duke nisur nga e premtja, periudhë gjatë së cilës flamujt në të gjitha institucionet qeveritare dhe publike do të valëviten në gjysmështizë.