“Uroj të mos jepni llogari pasi të më marrin jetën”: Paralajmërimi drithërues i Arlinda Zekajt tri ditë para se të vritej në Pejë

“Uroj që të mos vijë dita kur ju dhe institucionet përgjegjëse të detyroheni të jepni llogari vetëm pasi të jetë marrë jeta ime.” Kjo thirrje e dëshpëruar u shkrua nga Arlinda Sylaj Zekaj në një letër zyrtare drejtuar Kryeprokurores së Prokurorisë Themelore në Pejë, e cila mban vulën e pranimit më 22 tetor 2026. Mjerisht, vetëm tri ditë më vonë, më 25 tetor, 49-vjeçarja u vra barbarisht brenda shtëpisë së saj në Vitomiricë, ndërsa si i dyshuar për këtë krim të rëndë është kunati i saj. Përmes kësaj shkrese me karakter urgjent, viktima kërkonte ndërhyrjen e menjëhershme të organeve të drejtësisë, zbatimin e një urdhri gjyqësor, si dhe fillimin e hetimeve ndaj zyrtarëve që sipas saj kishin dështuar në përmbushjen e detyrës, përfshirë këtu edhe punonjësit e Qendrës për Punë Sociale. Në letrën e saj paralajmëruese, Arlinda shprehte hapur frikën për jetën, duke denoncuar faktin se përgjegjësitë po barteshin nga njëri institucion te tjetri, ndërkohë që rreziku që i kanosej asaj mbetej i lartë çdo ditë. “Kjo është shtesa ime e fundit”, kishte nënvizuar ajo me alarm, para se të shprehte drojën se institucionet do të reagonin vetëm atëherë kur t'i merrej jeta. Në mbyllje të kësaj shkrese, 49-vjeçarja lëshoi edhe fjalët drithëruese: “Tani po e kuptoj pse ka kaq shumë vrasje!” Fatkeqësisht, tri ditë pas dorëzimit të letrës në Prokurori, Arlinda u gjet e pajetë në dhomën e saj të gjumit, në shtëpinë që ndodhet në rrugën “Man Dedushaj” në Vitomiricë. Rrethanat e kësaj ngjarjeje bëhen edhe më shqetësuese. Po atë mbrëmje, Arlinda ishte paraqitur në Polici si viktimë e dhunës në familje. Pasi u intervistua nga hetuesit, ajo u shoqërua për në shtëpi nga një patrullë policore rreth orës 20:58. Mirëpo, vetëm dhjetë minuta pas largimit të zyrtarëve, Policia u njoftua për vrasjen e saj. Bazuar në të dhënat e para të hetimit, kunati i saj, Albert Sylaj, dyshohet se i ka marrë jetën duke e goditur me sëpatë në kokë.