“Shpresoj të mos jepni llogari pasi të më merret jeta” – Paralajmërimi drithërues i Arlinda Zekajt dërguar Prokurorisë pak ditë para se të ekzekutohej

“Uroj që të mos vijë dita kur ju dhe institucionet përgjegjëse të detyroheni të jepni llogari vetëm pasi të jetë shuar jeta ime”. Këto rreshta paralajmërues janë shkruar nga Arlinda Sylaj Zekaj në një shkresë zyrtare drejtuar Kryeprokurores së Prokurorisë Themelore në Pejë, dokument që mban vulën e pranimit të datës 22 tetor 2026. Vetëm tri ditë pas këtij apelimi, më 25 tetor, ajo u vra në mënyrë tragjike brenda shtëpisë së saj në Vitomiricë, ngjarje për të cilën dyshimet kryesore bien mbi kunatin e saj. Redaksia jonë ka siguruar këtë letër alarmante, përmes së cilës viktima kërkonte reagim të menjëhershëm nga organet e drejtësisë, zbatimin e një vendimi gjyqësor dhe nisjen e hetimeve ndaj zyrtarëve që, sipas saj, kishin shfaqur negligence në kryerjen e detyrave zyrtare. Dokumenti, i shënuar si urgjent dhe i adresuar drejtpërdrejt te Kryeprokurorja, dëshmon frikën e madhe dhe rrezikun real që Arlinda ndjente për sigurinë e saj fizike. Ajo kërkonte llogaridhënie dhe masa ndaj funksionarëve kompetentë, duke denoncuar praktikën e kalimit të përgjegjësisë nga një dikaster te tjetri, ndërkohë që kërcënimi ndaj saj mbetej prezent. Përveç kësaj, 49-vjeçarja kishte insistuar në zbarkimin urgjent të urdhrit të gjykatës dhe hetimin e thelluar të zyrtarëve të përfshirë në rast, duke përmendur specifikisht Qendrën për Punë Sociale. “Kjo është shtesa ime e fundit”, kishte shkruar ajo, duke shprehur hapur shqetësimin se institucionet do të reagonin dhe do të mbanin përgjegjësi vetëm pasi të ndodhte fatkeqësia. Në mbyllje të kësaj letre-thirrje për ndihmë, Arlinda kishte lënë një fjali domethënëse dhe tronditëse: “Tani po e kuptoj pse ka kaq shumë vrasje!” Vetëm 72 orë pas protokollimit të kësaj shkrese në dyert e Prokurorisë, ajo u gjet e pajetë në dhomën e gjumit të banesës së saj, e cila ndodhet në rrugën “Man Dedushaj” në fshatin Vitomiricë.