Festival pikësh në Superligë, Trepça shkatërron Yllin me epërsi prej 29 pikësh

Kampionia në fuqi e Kosovës në basketboll, skuadra e Trepçës, ka regjistruar një paraqitje fantastike duke mposhtur bindshëm Golden Eagle Yllin me shifrat 100:71. Në radhët e mitrovicasve u dallua Ja’Cori Payne, i cili ishte pikëshënuesi më i mirë me 18 pikë të realizuara, ndërsa një ndihmë të madhe në këtë triumf dha edhe basketbollisti i njohur, Drilon Hajrizi, me 17 pikë të shënuara. Ndërkaq, te skuadra nga Theranda, më efikasi në parket rezultoi të jetë Khalil Shabazz me 22 pikë, pasuar nga Davonte Bandoo që kontribuoi me 19 pikë të tjera. Pas kësaj xhiroje, renditja tabelare kryesohet nga Bashkimi me 11 pikë, i ndjekur nga Trepça dhe Bora të cilat grumbullojnë nga 10 pikë secila, ndërsa Golden Eagle Ylli pozicionhet më poshtë me 9 pikë.