Marine Le Pen zyrtarizon fushatën presidenciale: Premtime të forta për sigurinë, kufijtë dhe dëbimin e kriminelëve të huaj

Udhëheqësja e së djathtës ekstreme, Marine Le Pen, e cila kryeson garën për zgjedhjet presidenciale franceze të vitit të ardhshëm, ka nisur zyrtarisht fushatën e saj, duke dhënë premtime për rikthimin e rendit dhe besimit te qytetarët në vend. Në një kohë kur Franca po kalon një ndër periudhat e saj më sfiduese dhe të trazuara, Le Pen po pozicionohet si figura e vetme e aftë për të përballuar valën e krizave ekonomike, sociale dhe të sigurisë që kanë përfshirë shtetin. Duke iu drejtuar kundërshtarëve të saj politikë gjatë fjalimit, ajo u shpreh se shoqëria nuk ndodhet në fundin e botës, por në fundin e një bote të caktuar, e cila i përket pikërisht elitave ekzistuese. Për nisjen e fushatës, Le Pen ka zgodhur qytetin e Orleansit, vendlindjen e historikes Zhan D’Ark, e cila gëzon një respekt të veçantë mes nacionalistëve si simbol i patriotizmit dhe sovranitetit. Para mijëra mbështetësve të pranishëm, ajo kërkoi “tolerancë zero” dhe theksoi se garantimi i sigurisë mbetet misioni kryesor i institucioneve shtetërore. Ngjarjet e fundit, ku protestat masive për koston e jetesës u shoqëruan me trazira, akte vandalizmi dhe plaçkitje, duket se i kanë dhënë një hov të ri fushatës së saj. Sondazhet e fundit të publikuara e renditin atë në kuotat 32-33.5%, duke dyfishuar mbështetjen e kandidatit të majtë Jean-Luc Mélenchon që numëron 17%, ndërkohë që elektorati po largohet dukshëm nga strukturat tradicionale drejt forcave më ekstreme. Të dhënat statistikore tregojnë gjithashtu se Le Pen ka gjasa të fitojë bindshëm përballë Mélenchon në raundin e dytë të zgjedhjeve, i cili është parashikuar të zhvillohet në fillim të muajit maj. Në rast fitoreje, ajo deklaroi se synon krijimin e një qeverie të “unitetit kombëtar” dhe “pluralizmit”, e cila do të drejtohet nga Jordan Bardella, aktualisht president i partisë RN. Le Pen theksoi gjithashtu vizionin e joshtrirjes në konflikte të huaja, duke shprehur dëshirën që Franca të mbetet “një komb paqeje” dhe se të rinjtë francezë nuk do të dërgohen kurrë në luftëra që nuk i përkasin vendit. Ajo paralajmëroi gjithashtu synimin për të futur në Kushtetutë parimet themelore dhe vëllazërore të bashkësisë kombëtare. Ajo garantoi se projekti i saj qeverisës nuk do t’i takojë vetëm një force partiake, por do të jetë një nismë kolektive dhe thellësisht patriotike, duke hedhur poshtë çdo lloj komunitarizmi dhe duke ritheksuar ekzistencën e një dhe të vetmit komunitet, atij kombëtar. Fokusi kryesor i fjalimit të saj u mbështet te koncepti i “Rilindjes” kombëtare, duke u shprehur e bindur se e ardhmja e Francës do të jetë më e sigurt dhe më e begatë përmes këtij programi. Mes zotimeve të saj dallohet një qasje mjaft e rreptë ndaj imigracionit të paligjshëm, rivendosja e kontrolleve rigoroze në kufij, dëbimi i menjëhershëm i shtetasve të huaj me precedentë penalë, si dhe goditja pa kompromis e bandave dhe rrjeteve të trafikut të lëndëve narkotike. Megjithatë, ajo mund të përballet me fushatën duke mbajtur një byzylyk elektronik, pas dënimit të marrë për keqpërdorim të fondeve evropiane, një vendim ky që tashmë është apeluar. Në fushën e ekonomisë, programi i saj parashikon disiplinë fiskale, ulje takash për sipërmarrjet, zvogëlim të burokracisë dhe mbështetje për sektorët e industrisë, inovacionit dhe inteligjencës artificiale, ndërsa ka kundërshtuar çdo rritje të re të moshës së pensionit. Sa i përket politikës së jashtme dhe Bashkimit Evropian, Le Pen nuk ka kërkuar largimin e Francës nga blloku, por ka bërë të qartë se do të synojë zvogëlimin e ndikimit të Brukselit, kthimin e sovranitetit mbi ligjet dhe kufijtë, si dhe vendosjen e interesave kombëtare në plan të parë. Ky kongres kishte për qëllim të përcillte imazhin e një partie të bashkuar rreth udhëheqjes së saj, ku Jordan Bardella u rikonfirmua në krye të forcës politike, pavarësisht se fjalimi i tij u pengua për pak çaste nga disa aktivistë sindikalistë.