Gjoba deri në 500 mijë lekë për mosbindje në protesta, Petraj: Qeveria kopjoi modelin italian

Avokati Edmond Petraj ka analizuar paralajmërimet e fundit të qeverisë lidhur me masat e reja për tubimet, duke i krahasuar ato me praktikat e shteteve të Bashkimit Evropian, me theks të veçantë te Italia. Gjatë një interviste televizive këtë të diel në emisionin “Review” me Greta Topjanën, Petraj u shpreh se korniza e masave ngjan me standardet evropiane, pavarësisht se në vendin tonë sanksionet financiare rezultojnë më të lehta. Duke sjellë në vëmendje zhvillimet e fundit dhe protestat e zhvilluara së fundmi, ai theksoi se përgjegjësia ligjore duhet të rëndojë mbi organizatorët dhe ata persona që kanë nxitur akte dhune. “Unë të garantoj që do të dalë një faturë! Jo faturë financiare, por faturë përgjegjësie. Kushdo do të mbajë përgjegjësinë e vet”, u shpreh Petraj. Më tej, avokati ka ngritur kritika edhe lidhur me angazhimin e disa pedagogëve në krah të studentëve, duke hedhur dyshime mbi natyrën e sindikatës së tyre, të cilën e cilësoi të ngjashme me një mekanizëm fushatë të opozitës. “Mua m’u duk si një shtab elektoral i Partisë Demokratike”, deklaroi ai.