Juventusi kthehet te suksesi në Serie A, Zhegrova mbetet në stol ndaj Lecces

Skuadra e Juventusit ka regjistruar një fitore të rëndësishme në udhëtim kundër Lecces me rezultatin e pastër 2-0, në kuadër të xhiros së tetë në elitën e futbollit italian, Serie A. Bardhezinjtë e zhbllokuan ndeshjen në minutën e 29-të përmes Weston McKennie. Mesfushori amerikan shfrytëzoi në mënyrë perfekte një asistim nga Douglas Luiz, duke realizuar me një goditje të menjëhershme brenda zonës së rreptësisë. Dominimi i torinezëve u kurorëzua edhe me një tjetër gol para se të mbyllej pjesa e parë. Në minutën e 41-të, ishte vetë Douglas Luiz që shënoi golin e dytë, pas një pasimi tokësor nga Federico Gatti. Ylli brazilian konturoi bukur aksionin në hyrje të zonës, gjeti hapësirën e nevojshme dhe dërgoi topin në rrjetë në këndin e poshtëm të majtë, pasi më parë kishte prekur edhe shtyllën. Fraksioni i dytë i lojës solli një ritëm më të qetë në fushë, ndërsa në sekondat e fundit, saktësisht në minutën e 90+4-të, Lecce mbeti me një lojtar më pak pasi Kialonda Gaspar u ndëshkua me kartonin e dytë të verdhë, duke u larguar me karton të kuq. Vlen të theksohet se në këtë ballafaqim, sulmuesi i Kombëtares, Edon Zhegrova, nuk pati mundësi aktivizimi, duke e ndjekur të gjithë takimin nga banka rezervë.