Magjia e Shannon Shorter përmbys Pejën dhe mban Bashkimin në majë të elitës

Bashkimi ka regjistruar një fitore spektakolare me përmbysje në derbin e xhiros së gjashtë të Superligës së Kosovës në basketboll, duke mposhtur Pejën me rezultatin 86-79 pas një ndeshjeje me emocione të forta. Edhe pse sfida ishte e ekuilibruar, çerekun e tretë e kontrolluan prizrenasit, ndërsa në çastet më kritike të takimit u shfaq lojtari kyç Shannon Shorter. MVP i Superkupës së Kosovës mori përsipër përgjegjësinë dhe me serinë e pikëve të tij vendimtare i siguroi skuadrës portokalleze triumfin e madh. Shorter ishte i pandalshëm duke realizuar 27 pikë, i ndihmuar edhe nga Clavell, i cili kontribuoi me 15 pikë të tjera për skuadrën vendase. Për Pejën, e cila u mund edhe përkundër paraqitjes fantastike të Wilson me 27 pikë e 16 kërcime, nuk mjaftuan as kontributet dyshifrore të Altin Morinës me 13 pikë, Johnson me 11 dhe Arti Hajdarit me 10 sosh. Falë këtij suksesi, Bashkimi arrin fitoren e pestë sezonale dhe konfirmohet si lider i vetëm i renditjes tabelare edhe për këtë javë, ndërkohë që Peja regjistron humbjen e katërt dhe posicionohet në vendin e gjashtë.