Kurti e Spajiq diskutojnë në Mal të Zi për integrimin evropian dhe lidhjet infrastrukturore

Kryeministri i Republikës së Kosovës, Albin Kurti, është takuar me homologun e tij nga Mali i Zi, Milojko Spajiq, gjatë punimeve të Samitit të Procesit të Berlinit, ngjarje kjo e zhvilluar më 22 tetor në lokalitetin Shën Stefan të Malit të Zi. Përmes një komunikimi në rrjetet sociale, shefi i ekzekutivit kosovar bëri të ditur se e ka uruar kreun e qeverisë malazeze për progresin drejt anëtarësimit në Bashkimin Evropian, duke shtuar se Kosova synon të përfitojë nga ky model suksesi. Kurti vuri në dukje se Prishtina zyrtare vazhdon të presë marrjen e statusit të vendit kandidat dhe nisjen formale të negociatave për integrim në BE. Duke ndarë detaje nga kjo ngjarje, Kurti shkroi: "Takimin përmbyllës në Samitin e Procesit të Berlinit në Shën Stefan, më 22 tetor, e pata me Kryeministrin e Malit të Zi, Milojko Spajiq. E falënderova për mikpritjen dhe për kryesimin e Procesit këtë vit, dhe e përgëzova për hapat e sigurt që vendi i tij po bën drejt BE-së. Kosova dhe Mali i Zi janë fqinjë të mirë dhe kanë të përbashkët hovin e progresit demokratik, siç tregojnë shpesh edhe vlerësimet ndërkombëtare. Mali i Zi është më pranë anëtarësimit në BE dhe jemi të interesuar të mësojmë nga përvoja e tij, teksa Kosova pret statusin e vendit kandidat dhe hapjen e negociatave për anëtarësim. Biseduam edhe për thellimin e bashkëpunimit dypalësh, sidomos për ndërlidhjen më të mirë përmes infrastrukturës tokësore."