Goditje e rëndë për Real Madridin: Thibaut Courtois humbet përfundimisht 'El Clasicon'

Portieri kryesor i Real Madridit, Thibaut Courtois, nuk do të mund të paraqitet në superpërballjen e sotme ndaj Barcelonës në “Camp Nou”. Edhe pse klubi mbretëror njoftoi mëngjesin e së dielës se gardiani belg ishte hequr nga lista e futbollistëve të ftuar shkaku i një viroze gripale, vetë lojtari kishte shprehur vullnetin që të priste deri në sekondat e fundit për të provuar rikuperimin. Mirëpo, zhvillimet e fundit kanë shuar çdo shpresë, pasi është vendosur përfundimisht që Courtois të mos udhëtojë fare drejt Katalonjës, duke ia lënë vendin në portë ukrainasit Andriy Lunin. Në orët e para të mëngjesit, nga kompleksi stërvitor i Realit në Valdebebas ende mbretëronte optimizmi për një kthesë të mundshme shëndetësore të portierit. “Do të shohim se si do të kalojnë orët dhe nëse do të ndihet më mirë. Nëse ndodh kjo, do të udhëtojë drejt Barcelonës”, deklaronin burime nga radhët e klubit madrilen. Po ashtu, nga kampi i Valdebebasit shtohej: “Le të shohim nëse mund të rikuperohet 100 për qind dhe të udhëtojë”. Pavarësisht diagnozës mjekësore që e nxirrte jashtë formacionit,faqja e grintës së Courtois e shtyu atë të mos dorëzohej lehtë, duke shpresuar deri në momentet e fundit se do të arrinte të ishte i pranishëm në njërën ndër sfidat më vendimtare të edicionit. Megjithatë, simptomat e gripit rezultuan shumë më të rënda sesa ishte parashikuar fillimisht. Pas njoftimit se belgi ishte prekur nga një virozë e rëndë, brenda klubit gjendja e tij u përshkrua shkurt: “Është i rraskapitur”. Infeksioni viral e ka kapluar plotësisht portierin e Realit, duke e detyruar të shikojë ndeshjen nga shtëpia dhe duke i hapur një telash serioz trajnerit Jose Mourinho. Pavarësisht mungesës së pazëvendësueshme të belgut, drejtuesit dhe stafi teknik në Madrid shfaqin qetësi dhe besim të plotë te zëvendësuesi i tij, Andriy Lunin, i cili pritet të debutojë me përgjegjësi të plotë në këtë duel madhështor. “E kemi Luninin. Ai është shumë i mirë”, theksohet nga kampi madrilen, duke dëshmuar besimin e patundur se gardiani ukrainas është plotësisht i aftë t'i bëjë ballë presionit të kësaj supersfide.