Incident i rëndë në Pançevë: Persona të maskuar sulmojnë me shkopinj dhe mjete piroteknike pranë një qendre votimi

Një grup të rinjsh janë vënë në shënjestër të një sulmi të dhunshëm nga persona të maskuar pikërisht jashtë ambjenteve të Shkollës Bujqësore në Pançevë të Serbisë, e cila shërben si qendër votimi. Ngjarja ka shkaktuar tension të lartë në zonë, ndërsa autorët kanë përdorur shkopinj dhe mjete piroteknike gjatë përleshjes. Në videoregjistrimet që po bëjnë xhiron e rrjeteve sociale duket qartë momenti kur disa individë me fytyra të mbuluara, kapele dhe kapuça mësyjnë kundër një grupi tjetër të rinjsh. Sipas pamjeve të bëra publike nga mediumi lokal PANpress, pasojat e dhunës kanë qenë të dukshme, ku njëri nga personat e sulmuar shfaqet i lënduar dhe me shenja gjaku në fytyrë. Politikanja Marinika Tepiq ka shpërndarë gjithashtu pamjet e incidentit, duke pohuar se dhuna ndaj të rinjve ka ndodhur menjëherë pasi ata kishin përmbyllur procesin e votimit, duke u goditur me mjete të ndryshme fortëse dhe piroteknike. Në të njëjtën linjë me raportimet, është bërë e ditur se agresorët e maskuar kanë vënë në shënjestër edhe vëzhguesit e Listës Studentore në Pançevo, duke i sulmuar ata me mjete piroteknike. Si pasojë e goditjeve në kokë, disa prej tyre kanë pësuar lëndime, ndërkohë që njësitë e policisë kanë ndërhyrë duke dalë në vendin e ngjarjes për të zbardhur rrethanat.