Refuzohet hyrja në Maqedoninë e Veriut, ish-deputeti i PD-së: Më bllokoi shërbimi sekret për shkak të UÇK-së

Autoritetet e Maqedonisë së Veriut kanë ndaluar në pikën kufitare të Bllatës, në Dibër, ish-deputetin e Partisë Demokratike, Azgan Haklaj, i cili po udhëtonte drejt Shkupit së bashku me gazetarin Ferdinand Samarxhiu. Gjatë një interviste për gazetaren Ana Kurti, Haklaj ka bërë të ditur se atij i është komunikuar vendimi se nuk mund të futet në territorin maqedonas, me arsyetimin se përbën “kërcënim për sigurinë publike kombëtare” të këtij shteti. Sipas ish-ligjvënësit, ky bllokim ka lidhje të drejtpërdrejtë me qëndrimet e tij dhe mbështetjen e hapur që i ka dhënë Ushtrisë Çlirimtare të Kosovës (UÇK), si dhe aktiviteteve të zhvilluara në Tiranë e Shkup në mbrojtje të katër ish-liderëve të UÇK-së. “Sot më thanë që ndalohesh të hysh në RMV sepse je kërcënues i sigurisë publike kombëtare të RMV. Më nxorën një dokument dhe më thanë: ‘Firmose’. Dhe i thashë: ‘E firmos që refuzoj motivacionin’. Përfaqësuesi i autoriteteve maqedonase aty më tha: ‘Jo’”, deklaroi ai. Pasi është përballur me këtë situatë, Haklaj tregon se ka vënë në lëvizje disa personalitete politike dhe aktorë diplomatikë për të kërkuar shpjegime të detajuara rreth ndalimit të tij. “Në këto kushte kam njoftuar Ali Ahmetin, kryetarin e BDI-së, ambasadorin Denion Meidan, Rafis Alitin, ish-nënkryetar i Parlamentit të RMV-së, dhe Arbër Ademin, deputet i RMV-së. Ua shpjegova situatën dhe, pas shumë kontaktesh të tjera, më thanë që nuk të ka ndaluar policia, por shërbimi sekret i RMV-së”, u shpreh ai. Ai sqaroi më tej se struktura sekrete ndahet në atë të brendshme, e cila i raporton kryeministrit Hristijan Mickoski, dhe atë të jashtme, e cila varet nga Presidenti. Sipas tij, shkak i këtij veprimi është bërë pjesëmarrja e paralajmëruar në tubimin “Marshi i Lirisë” në Shkup. Në lidhje me hapat e ardhshëm, ish-deputeti njoftoi se do t'i drejtohet sërish zyrtarisht Ministrisë për Evropën dhe Punët e Jashtme për këtë ngjarje. “Unë edhe për ndalesat e tjera i kam shkruar letër publike Ministrisë së Jashtme. Ndërkohë i kam thënë edhe ambasadorit në RMV dhe emri nuk më është hequr nga lista. Ky problem është vetëm me RMV-në. Unë do t’i drejtohem sërish Ministrisë së Jashtme për këtë ndalim”, theksoi Haklaj. Ai kujtoi se tensionet me autoritetet e vendit fqinj nisën menjëherë pas protestës së 17 tetorit të vitit të kaluar, e cila u mbajt në sheshin “Skënderbej” në Tiranë. Për më tepër, ai pretendon se ka pasur histori të ngjashme edhe në të kaluarën nga qarqe të ndryshme. “Historia me Maqedoninë e Veriut ka nisur pas 17 tetorit të vitit të kaluar, kur ne bëmë protestën në sheshin ‘Skënderbej’ në Tiranë. Ndërsa historia ime me sllavët ka filluar herët, kur në vitin 2011 Ministria e Jashtme e Rusisë ka bërë një notë proteste kundër meje, për qëndrimet dhe deklaratat e mia në Preshevë”, shtoi ai. Haklaj përfundoi duke theksuar se megjithëse masat e mëparshme janë kaluar pas insistimit të tij në kufi, kësaj radhe situata ka qenë më e prerë, ndonëse udhëtonte së bashku me gazetarin Ferdinand Samarxhiu, ndalimi kishte në shënjestër vetëm atë.