Kurti takon homologun malazez Spajiq në Samitin e Procesit të Berlinit: Kosova kërkon të ndjekë hapat e Podgoricës drejt BE-së

Kryeministri i Republikës së Kosovës, Albin Kurti, është takuar më 22 tetor me homologun e tij malazez, Milojko Spajiq, në kuadër të punimeve të Samitit të Procesit të Berlinit që po mbahet në Shën Stefan. Përmes një komunikimi publik, kreu i ekzekutivit kosovar ka bërë të ditur se i ka shprehur falënderime Spajiqit për pritjen e ngrohtë dhe për udhëheqjen e kësaj nisme rajonale gjatë këtij viti. Gjatë këtij takimi, ai gjithashtu i ka drejtuar urime kreut të Qeverisë malazeze për hapat e rëndësishëm dhe sukseset e arritura në rrugën drejt integrimit të plotë në Bashkimin Evropian. Në fjalën e tij, shefi i Qeverisë së Kosovës vuri në dukje se dy vendet fqinje ndajnë marrëdhënie të shkëlqyera dhe kanë aspirata të njëjta për zhvillim të gjithanshëm dhe demokratik.