Kriza ekonomike nën udhëheqjen e Mickoskit, LSDM: Qytetarët po zhyten në varfëri, u hodh poshtë propozimi për pagë minimale prej 600 eurosh

Vala e vazhdueshme e shtrenjtimeve dhe moslakueshmëria e të ardhurave ndaj inflacionit po e rëndojnë çdo ditë e më shumë buxhetin e familjeve vendase. Ky është tabloja e zymtë e situatës ekonomike që paraqet Lidhja Socialdemokrate e Maqedonisë, e cila ka hedhur akuza të forta ndaj kabinetit qeveritar të kryeministrit Hristijan Mickoski për mungesë totale të strategjive mbrojtëse për standardin e jetesës. Sipas forcës kryesore opozitare, shpenzimet e domosdoshme mujore për një familje kanë kapur shifra marramendëse që nuk mund të përballen as me tri paga minimale të bashkuara, ndërkohë që paralajmërimet flasin për valë të reja shtrenjtimesh duke nisur nga muaji janar. Nëpërmjet një kumtese zyrtare, LSDM vë në dukje se secili muaj i këtij viti është shoqëruar me rritje të çmimeve, duke bërë që sigurimi i produkteve elementare të jetës të jetë bërë mision pothuajse i pamundur. “Vetëm që nga fillimi i vitit, shpenzimet e jetesës janë shtrenjtuar për 4.000 denarë”, bëhet e ditur në reagim. Shporta minimale sindikale për periudhën e tetorit ka kaluar shifrën e 70.000 denarëve, ndërsa nëse llogaritet edhe pagesa e qirasë, ajo afrohet në shifrën prej 90.000 denarësh. “As tri paga minimale nuk mjaftojnë për të mbuluar nevojat bazike të një familjeje”, theksojnë nga opozita. Nga kjo parti bëjnë me dije se rreth 180 mijë punonjës në mbarë vendin vazhdojnë të marrin paga mujore më të ulëta se 31.200 denarë, kurse paga minimale mbetet e bllokuar në rreth 26 mijë denarë. “Punëtori djersitet gjithë muajin, por shpërblimi financiar nuk i mjaftjon për mbijetesë. Ky është realiteti pas retorikës boshe të Mickoskit: jo ekonomia e tretë evropiane, por një standard jetësor që nuk arrin as një të tretën e atij kontinental”, shprehen të revoltuar nga LSDM. Opozita ngre akuza se kreu i ekzekutivit ka shkelur dhe refuzuar të gjitha nismat e tyre për zbutjen e krizës, ku përfshihet ngritja e pagës minimale në kufirin e 600 eurove, si dhe dhënia e ndihmës financiare për bujqit. Sipas tyre, Qeveria ka shfaqur pasivitet të plotë përballë shtrenjtimit të faturës së jetesës. “Mickoski i hodhi poshtë masat tona që në nismë të krizës. Ai refuzoi pagën minimale prej 600 eurosh dhe mbështetjen për bujqësinë. Gjatë gjithë vitit sheh se si çmimet fluturojnë, por refuzon çdo formë ndihme për qytetarët”, nënvizohet në deklaratë. LSDM ka vënë në shënjestër edhe ribuxhetimin e ri, duke aluduar se ai nuk parasheh asnjë masë konkrete për ngritjen e pagës minimale, frenimin e çmimeve apo stimulimin e sektorit agrar. Sipas tyre, në vend të politikave sociale ndihmëse, pushteti po zgjedh rrugën e huamarrjeve që do të rëndojnë mbi shpatullat e pasardhësve. “Edhe buxheti i ribuxhetuar nuk sjell asgjë të re: nuk ka pagë minimale më të lartë, nuk ka frenim të çmimeve dhe as ndihmë për fshatin. Ka vetëm borxhe të reja dhe norma të larta interesi, faturën e të cilave do ta shlyejë populli”, paralajmëron LSDM. Partia opozitaren shton se gjatë dy viteve të mandatit të Mickoskit, detyrimet ndërkombëtare janë rritur për katër miliardë euro, duke arritur afërsisht gjysmën e borxhit historik të shtetit. “Borxh mbi borxh, ndërsa për qytetarët nuk ka fonde. Jeta e tyre bëhet çdo ditë e më e papërballueshme”, thuhet në reagim. Në përfundim, LSDM e vlerëson degradimin e standardit si rezultat të drejtpërdrejtë të zgjedhjeve ekonomike të Qeverisë, duke e fajësuar se u jep përparësi favoreve partiake para halleve të qytetarëve. “Kjo varfëri është fruti i vendimeve të Mickoskit: që të mos ketë fonde për punëtorët, por vetëm për tenderët e ngushtë partiakë”, përmbyllet kumtesa.