Gara për Topin e Artë: Ish-ylli i Real Madridit preferon Mbappen në vend të Yamalit

Ish-mesfushori i njohur i Liverpoolit dhe Real Madridit, Steve McManaman, ka dhënë mendimin e tij rreth garës për fituesin e ardhshëm të Topit të Artë, duke e dhënë votën e tij për Kylian Mbappen në dëm të talentit të Barcelonës, Lamine Yamal. Gjatë një prononcimi për “365Scores”, ish-reprezentuesi anglez i ka thurur elloge sulmuesit francez, duke vënë nendëvizje aftësinë e tij për të qenë vendimtar në duelet më të rëndësishme, si dhe pjekurinë e nevojshme për të përballuar barrën e madhe të presionit. “Do ta zgjidhja Kylian Mbappen. Ai është një futbollist që mund ta bëjë dallimin dhe të shënojë gola në ndeshjet më të mëdha, ndërsa ka përvojë të mjaftueshme për ta përballuar presionin”, u shpreh McManaman. Megjithatë, anglezi nuk ka ngurruar të shprehë admirimin e tij edhe për paraqitjet e Lamine Yamal, duke pranuar se spanjolli i ri ka regjistruar standarde të larta loje pavarësisht moshës së tij tenderë. “Lamine Yamal është një futbollist shumë i talentuar dhe ka luajtur në nivel të lartë pavarësisht moshës së tij të re, por nëse duhet të zgjedh mes të dyve tani, do të votoja për Mbappen”, shtoi ai. Krahas diskutimeve për çmimet prestigjioze individuale, McManaman ka ndarë mendimet e tij edhe rreth supersfidës “El Clasico” mes Real Madridit dhe Barcelonës, duke paralajmëruar një betejë të ashpër ku fatin e takimit mund ta vulosin detajet. Ai analizoi se mungesa e Vinicius Junior për shkak pezullimi do të përbëjë një goditje për “Los Blancos”, meqenëse profilin unik të brazilianit është tejet e vështirë ta zëvendësosh me ndonjë lojtar tjetër. “Mbappe ka cilësi të jashtëzakonshme, natyrisht, por ata janë dy futbollistë krejtësisht të ndryshëm dhe nuk mund ta zëvendësosh gjithçka që ofron Vinicius thjesht duke vendosur një tjetër futbollist në pozitën e tij”, theksoi ai. Pavarësisht kësaj sfide, ish-futbollisti mbetet optimist se madrilenët mund t'ia dalin me sukses në transfertë përballë katalanasve. “Shpresoj që Real Madridi të fitojë 3-1, por ta shohim se çfarë do të ndodhë. Kjo ndeshje gjithmonë i tejkalon pritshmëritë”, përfundoi mesfushori i dikurshëm. Përballja mes dy superfuqive të futbollit spanjoll vazhdon të mbetet një nga ngjarjet më madhore të kalendarit sportiv, ku dritat e prozhektorëve do të jenë të përqendruara te përplasja në distancë mes Mbappes dhe Yamalit, dy protagonistë kryesorë në skenën ndërkombëtare.