Nën drejtimin e Besnik Hasit, Amedspori rrëmben kreun e renditjes në futbollin turk

Puna e trajnerit nga Kosova, Besnik Hasi, po fiton vëmendje të madhe në arenën e futbollit turk, pasi skuadra e tij, Amedspor, është ngjitur në majën e tabelës pas kalimit të nëntë javëve kampionale. Klubi ka mbledhur gjithsej 20 pikë, falë një ecurie prej gjashtë fitoresh, dy barazimesh dhe vetëm një humbjeje, ndërsa bilanci i golave flet për 20 gola të shënuar dhe 10 të pësuar. Triumfi i mbrëmshëm me shifrat 2:1 si mysafir ndaj Samsunspor-it ka shkaktuar festë të shfrenuar në kampin e skuadrës që udhëhiqet nga strategu shqiptar. Formacioni i drejtuar nga Hasi e përmbysi rezultatin në fraksionin e dytë të lojës, falë saktësisë së Orbanit nga pika e bardhë në minutën e 73-të dhe golit të Dia Sabës në minutën e 80-të. Në këtë duel të rëndësishëm, dy futbollistët e Përfaqësueses së Kosovës, Lumbardh Dellova dhe Ermal Krasniqi, e nisën takimin si titullarë, me këtë të fundit që u largua nga fusha përmes zëvendësimit në minutën e 75-të. Me të përfunduar ndeshja, Besnik Hasi doli para gazetarëve në konferencën për shtyp, ku analizoi ecurinë e grupit të tij dhe komentoi suksesin e arritur në transfertë. Tekniku shqiptar nuk e fshehu gëzimin për korrjen e tri pikëve të reja, megjithëse pranoi hapur se nuk kishte mbetur i kënaqur nga qasja e skuadrës gjatë 45 minutave të para. “Jemi të lumtur që fituam në udhëtim. Nuk jam i kënaqur me pjesën e parë. Nuk luajtëm mirë. Krijuam disa raste, por duhet t’i shfrytëzosh këto mundësi për të shënuar. Ne nuk arritëm t’i konkretizonim rastet tona. Më pas, në kundërsulmin e parë, pësuam gol. Kjo nuk ishte loja jonë”, u shpreh Hasi. Sipas raportimeve të mediave vendase, Hasi vuri në dukje se ekipi i tij mori kontrollin e lojës pasi të dyja skuadrat mbetën me nga dhjetë lojtarë në fushë, duke lavdëruar karakterin e treguar në pjesën e dytë dhe efektin e lëvizjeve taktike. “Kur mbetëm me nga dhjetë lojtarë, ishim më të mirë. Krijuam më shumë raste shënimi. Në pjesën e dytë bëmë disa ndryshime dhe skuadra luajti më mirë. Reaguam më mirë për ta zhvilluar lojën tonë”, përfundoi trajneri i Amedspor-it.